Gaur arratsean inauguratuko dute Ikuska Trintxerpen
Barrezko eta beldurrezko film laburrak ikus daitezke gaur, zine erakustaldiaren XVI. aldiko lehen eguneko emanaldi bikoitzean; lehiaketarako lanen erakustaldiak astelehenetik ostiralera izango dira; lehengo ostegunean euskaltegietako ikasleek euskarazko bost film labur ikusteko aukera izan zuten, aurtengo Mintzagun saria erabakitzeko.
Dena prest dago Trintxerpen zinemaren festa hartzeko. Establezimendu askotako erakusleihoetan filmetako apaingarriak ikus daitezke, Ikuskaren hasieraren iragarle. Inaugurazio ofiziala gaur arratsean izango da, 19:30ean, Trintxerpeko alkateordetzan. Urtero legez, Emea eta anitza zikloarekin abiatuko da erakustaldia arratsaldean, Bekoz Beko elkartearen laguntzaz, eta gauean, barre egiteko gogoz dabiltzanen txanda izango da, Gau Guasa zikloa 22:30etatik aurrera hasiko baita.
Zine asteburua
Lehiaketaren barruko film laburren emanaldiak astelehenean hasiko dira, eta ostirala bitartean, egunero izango dira Trintxerpen; Donibanen eta Antxon aldiz, astelehenean hasi eta asteazkena bitartean.
Bihar, bestalde, bi jarduera izango dira Ikuskari lotuta. Eguerdian, Donibaneko plazan, Konstantzia Musika Bandak kontzertua eskainiko du, eta pelikuletako soinu banda ezagunak interpretatuko dituzte. 13:00etan da kontzertua.
Arratsaldean berriz, orain gutxi saritutako Five Days To Dance dokumentala ikusteko aukera izango da.
Mintzagun Saria
Euskarak tokia irabazi du azken urteotako Ikuskan. Iaztik Mintzagun Saria banatzen dute film laburren erakustaldian. Hala, lehengo ostegunean, eskualdeko euskaltegi guztietako ikasleek euskarazko bost film labur –Homeland, Atarixa, Irudi mintzatuen hiztegi poetikoa, Aitona mantangorria eta Otsoko– ikusteko aukera izan zuten. Bost lanak ikusi ondoren, beren gustukoena zein zen bozkatzeko aukera izan zuten ikasleek, eta saria hilaren 22an emango dute jakitera, Ikuskaren sari banaketaren barruan. Mintzagun Sariraren irabazleak, zinemagintzari buruzko tailerrak emango ditu datorren urteko otsailean euskaltegietan, eta 600 euro poltsikoratuko ditu.
