Istilu batzuk gertatu dira Oiartzunen Ortuzarren hitzaldian
Hitzaldia eman behar zuen aretoaren aurrean elkarretaratzea egin zuten "euskal eskola nazionalaren alde", eta oihu artean hartu zuten EAJko buruzagia
“Euskal eskola nazionalaren” aldeko elkarretaratze batekoek oihu artean hartu dituzte EAJkoak. Ertzainek hainbat lagun identifikatu dituzte, Ikasle Abertzaleen arabera
Enekoitz Esnaola / Berria Atzo iluntzean Oiartzunen Heziberriri ez. Guk Euskal Eskola Nazionala! lelopean elkarretaratze bat izan zen udal liburutegiaren aurrean, Andoni Ortuzar EAJren EBBko presidentea hango aretoan hitzaldi bat egitera zihoala, eta istiluak gertatu ziren. Elkarretaratzean bildutakoek oihu artean hartu zituzten EAJko ordezkariak. Liburutegiko sarrerako ate pareraino joan ziren han bildutako asko, tentsioa areagotuz joan zen, Ertzaintzaren furgonetak azaldu ziren eta poliziek sakabanatu egin zituzten han bildutakoak. @OarsoBidasokoIA-k dioenez, hiru lagun idenfitikatu zituzten. Iturri hark dio Ertzaintza “oldartu” egin zela. “Harrituta” agertu zen Ortuzar. “Hau ez zait sekula gertatu”, zioen hitzaldia hasi aurretik, liburutegian zela. Ezker abertzalea izan zuen hizpide. “Politika egin nahi du ezker abertzaleak, baina zailtasun handiak dauzka bere jendeak hori modu harmoniatsu batean onartzeko, orain ikusi dugun moduan. Askok ez dute onartzen haren aldaketa estrategikoa”.
