Jose Angel Rodriguez, PSE-EEren alkatetzarako hautagaia: "Alkatetzaren bila goaz"
Alkategai sozialistak bere hautagaitzaren aurkezpena egin zuen atzo arratsaldean, Herriko Etxean. EH Bildu buru duen udal gobernuari kritika zorrotzak egin zizkion, eta sozialistak "alternatiba bakarra" direla ziurtatu zuen.
Atzo aurkeztu zuen PSE-EEk Errenteriako alkatetzarako bere hautagaia: Jose Angel Rodriguez. Primariorik ez dute egin behar izan, beste hautagaiek —Aitor Gonzalez eta Paco Alvarez Barralek— ez dituztelako bermerik jaso afiliatuen artean.
Denis Itxaso ahaldun nagusi izateko hautagaiak egin zuen ekitaldiko sarrera. Errenteria-Oreretarekin duen harremana gogoratu zuen. Bere ustez, PSE-EEk ez zuen alkatetza “inoiz galdu behar, eta orain Bildu pairatzen ari gara”. Itxasoren ustez, “Errenteria alkate sozialistekin hazi, hobetu eta aurrera joan da. Orain gobernatzea merezi dugu”. Bestalde, aurkezpena izan zen tokia, Herriko Etxea, hainbat aldiz erasotua izan zela gogoratu zuen: “Horrek ez gaitu kikildu”.
Udal Gobernu Taldearentzako hitz gogorrak izan zituen: “Asko hitz egiten da Julen Mendoza alkateaz, baina jakin ezazue Bilduk bere benetako aurpegia gehiengo osoa duenean agertzen duela. Gure indarragatik ez dute atez atekoa bezalako gehiegikeriarik egin”.
“Alternatiba bakarra gara”
Jose Angel Rodriguezek, bere aldetik, Bildu beste legegintzaldi batez “jasan ezin daitekeela” esan zuen. “Ez da parte hartzerik egon, dirua xahutu dute, alderdikeriz jokatu dute eta akordioak ez dituzte bete”. Lekuonako proiektua eta Atlantikaldia kritikatu zituen, “Bilduk herritarrei hori eman die bere gabeziak ezkutatzeko”. Esan zuen udal gobernuak ez duela “ezer ere ez egin”, aurreko legegintzaldiko “proiektuak bukatu eta besterik ez”.
Bere proposamenen artean bosgarren edukiontzi boluntarioa, zerbitzuak eta aisia “deszentralizatzea”, hirugarren adinekoentzako zinegotzia sortzea eta etxe kaleratzeak gelditzea daude, besteak beste. Hemendik aurrera, “militante sozialista guztien artean”, programa eratuko dutela iragarri du: “Alkatetzaren bila goaz. Alternatiba bakarra gara”.
Jose Angel Rodriguez, PSE-EEren alkategaia
