Oarsoarrak Euskararen Saria Kimutx-entzat, eta aipamen berezia Izaskun Madariagari

Elkarteak zein Madariagak haurren heziketa euskaldunean egindako urratsak aitortu ditu Oarsoaldeko Euskara Batzordeak.

oarso bidasoko hitza

Oarsoaldea

2014/11/29

Izaskun Madariaga, aipamena jaso ondoren

Kimutx Kultur Elkarteak jaso zuen atzo arratsean 2014ko Oarsoarrak Euskararen Saria. Euskal mitologian oinarritutako jolasak, ipuinak, kantak eta bestelako material didaktikoaren sortzaile da Kimutx, Oarsoaldean du jatorri, eta euren jarduna batez ere 0-12 adin tarteko haurrei zuzenduta dagoen arren, guraso eta helduentzat ere bada euren proposamena. Nora Barrosok jaso zuen Kimutx-en izenean saria. Bestalde, urtero pertsona bati aipamen berezia egiten diote sarien banaketan. Aurten, Izaskun Madariagari egin diote aipamen hori; pozik jaso zuen saria oiartzuarrak. Haur txikien hezitzaile eta pedagogoa da Madariaga, eta urte luzez lan egin du zeregin horretan, baita beste hainbat arlotan ere. “Ibilbide profesional guztian euskara ezpainetan erabiltzeagatik” eman diote aipamen berezia. Atzo egin zuten sari emate ekitaldia Errenteria-Oreretako Xenpelar Etxean. Bertan, Oarsoaldeko udaletako ordezkariak izan ziren, baita hamarnaka gonbidatu ere. Aldundiko Euskara zuzendari Zigor Etxeburua ere bertan izan zen, eta bere hizketaldian nabarmendu zuen sarituen “ahalegin era konpromisoa miresgarria” dela, “horri esker euskara mantentzen ari da, hitz eginez, transmitituz”. Julen Mendoza Errenteriako alkateak eta Amaia Agirregabiria Pasaiakoak ere hizketaldia egin zuten. Biek ala biek adierazi zuten euskararen alde lanean ari direnek aitortza publikoa behar dutela, eta horren oinarrian dagoela Oarsoarrak Euskararen Saria, “euskararen normalizazioaren alde elkartu egin behar dugu”. Ordezkari politikoez gain, Mertxe Mugikak, Asier Amondok (AEK-koa, Korrikari buruz mintzo zen) eta Josu Waliñok (Puntueus elkarteko zuzendaria) parte hartu zuten ekitaldian. Iraitz Mateo nahiz Ander Lizarraldek bertso musikatuak abestu zituzten Errenteria Musikaleko kideekin elkarlanean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.

Oarsoarrak Euskararen Saria Kimutx-entzat, eta aipamen berezia Izaskun Madariagari

Gipuzkoa

Tolosa eta Beasain lotzen dituen Renfeko tren zerbitzua etengo dute abuztuaren 29tik irailaren 1era

Salmonellosi agerraldi batek 29 pertsonari kalte egin die Eibarren

Pasaiako eta Lezoko alkateek «erantzunak eta neurriak» eskatu dituzte portuko sutearen harira

Gizon bat atxilotu dute Irunen, prostituzio etxe batean emakume bati sexu erasoa egitea egotzita

KASek salatu du Donostiako Udaltzaingoa «jazartzen» eta «zigorra ezartzen» ari zaiela ogitartekoak banatzen dituzten herritarrei

Hondarribiko alarde baztertzailearen aldekoek utzi egin dute konponbiderako elkarrizketa prozesua

GHKk espediente bat irekiko du Zubietako erraustegiko sutearen nondik norakoak argitzeko

Donostiako Harrera Sareak salatu du lau kide identifikatu dituztela etxegabeei janaria emateagatik