Irabazi Errenteria aurkeztu dute, herri "bidezkoago" baten alde
Irabazi Errenteriak aurkezpena egin zuen atzo arratsaldean, bere ildoak aurkeztuz. Programa eratzeko eta hautagaiak aukeratzeko prozesua abiaraziko dute hilaren 13an, Xenpelar Etxean egingo duten batzarra batekin.
“Aldaketa garaietan bizi gara, eta aldatu nahi dugu”. Hala adierazi zuten atzo atzoko aurkezpenean Patxi Astibiak —euskaraz— eta Ana Laboak —gazteleraz—. Errenteria-Orereta “bidezko, iraunkor, solidario eta parte hartzaileagoa” nahi dutela adierazi dute. Horretarako Irabazi Errenteria iniziatiba sustatu dutela esan dute. “Bateratzerako gune berriak” sortu nahi dituzte, “bakoitzaren identitatea errespetatuz, batuketa aritmetikotik harago joateko”.
Irabaziren baloreak hauek direla jakinarazi dute: etika, aniztasuna, ezkerreko politika, ekologia, feminismoa eta errepublikaren aldeko baloreen oinarriak. Publikoa dena “bereziki zainduko” dutela iragarri dute, eta halako Errenteria-Orereta irudikatzen dute: “etxebizitza bermatuko dugu; hezkuntza; berdintasuna; osasuna; ongizatea; etxe kaleratzerik eta bidegabekeriarik gabe; demokrazia parte hartzailea nahi dugu, gizarte kontrol, aurrekontu parte hartzaile, eta herri kontsulta eta ekimenekin batera”. Hauek izango dituzte Irabaziren programa osatzeko oinarrizko printzipioak:
Irabazi Errenteria
- Barne demokrazia, prozesuan protagonismo eta parte hartze soziala oinarri izango duena.
- Gardentasuna: “Erabateko gardentasunez” jokatu nahi dute. Hautetsi guztiek udal jarduera guztia kontrolatua izateko konpromisoa hartu beharko dute. Era demokratikoan hartutako erabakiak ere errespetatuko dituztela esan dute.
- Parte hartzea: Eztabaidarako gune irekiak bermatuko dituzte, erabaki adostuak eta gehiengoaren printzipio demokratikoak errespetatuko dituzte.
- Integrazioa: Genero ikuspuntua kontuan hartuko dute, baita LGBT, migrante eta beste hainbat kolektibo ere.
