Oiartzunen eta Errenterian, gaur, Abadiñoko emakumeen hilketak salatzeko elkarretaratzeak
Oiartzungo elkarretaratzea plazako Txoko Feministan egingo dute, eta Errenteria-Oreretakoa Niessenen. Biak 19:30ean dira.
Gaur, 19:30ean eta Doneztebe plazako Txoko Feministan, Oiartzungo Antiju Morik taldeak elkarretaratzera deitu ditu herritarrak, asteartean gizon batek bi emakume hil zituelako. “Nazkatuta gaude. Oso haserre. Beste behin ere emakumeon aurkako indarkeria kasu baten aurrean gaude. Kontziente gara, emakumeon aurkako indarkeriak ez duela etenik, eta honen aurrean ezin dugu gure amorrua, nekea eta haserrea besterik adierazi. Emakumeok aske bizitzeko eskubidea dugu!”, esan dute Antiju Morik taldeko kideek. Errenteria-Oreretan ere egingo dute elkarretaratzea, 19:30ean, Niessenen atarian.
Oiartzungo Udalak bat egin du deialdiekin, eta Oarsoaldeko gainontzeko udalek ere bat egin dute Emakumeen Mundu Martxak egin dituen salaketa deialdiekin. “Adierazi nahi dugu publikoki eta aho batez emakumeenganako indarkeriaren aukako gure jarrera. Horrelakoak ez ditugu onartzen gure gizartean, eta horregatik, lanean jarraitu behar dugu erakunde, eragile eta herritarrek, emakumeak indarkeria matxistarik gabe bizi daitezen”, esan du udalak.
Bai udalak, Oarsoaldeko beste udalek, eta Errenteriako Berdintasun Kontseiluak, eta Pasaiako Berdintasun Mahaiak, emakumeen familiei elkartasuna adierazi diete.
