Joseba Goñi omenduko du udalak, herriaren historia jasotzeko egindako lanagatik
Goñi Galarragak, apaiz lanak egiteaz gain, irakaskuntzan aritu da, Donostiako Deustuko Unibertsitearen Historia fakultatean eta Gasteizko apaizgaitegian.
Horrez gain, udalak jakinarazi duenez, Errenteria-Oreretako historia ikertzen jardun du hainbat urtez, “Juan Ignacio Gamon eta Serapio Mujikaren lanarekin jarraituz”. Udalak “eskerrik zintzoena” adierazi nahi dio ostiraleko ekitaldian, eta hiriaren alde egindako lana eskertuko dio. Julen Mendoza alkateak eta Edorta Kortadik —Goñiren ikasle izandakoak— hitz batzuk eskainiko dizkiote. Omenaldia 18:30ean hasiko da, udaletxeko areto nagusian, eta irekia izango da.
