Txistorra eta talo usaina barreiatuko da asteburuan Pasaian
Antxotarrek bihar ospatuko dute San Tomas, eta etzi sanpedrotarrek, Proisaren eskutik.
San Tomas izango da Pasaian protagonista nagusia asteburuan. Bihar goizean Antxon izango da feria, Gure Zumardian, eta etzi, berriz, San Pedron, frontoiko zumardian.
Antxoko feria 11:00ak inguruan zabalduko dute. 30 postu inguru izango dira zumardian; barazkiak, animaliak, artisauak, abereak, eta nola ez talo eta txistorra postuak ez dira faltako. Aurten, gainera, Lizeoko ikasleek sortutako Olentzeroen erakusketa izango da. 12:00etan Lizeoko ikasleen emanaldia hasiko da, eta aurretik eta ondoren, katu jira, Alkarkide eta Alkartasunako kideak ariko dira plaza inguruak girotzen. Goiz guztian zehar –baita gaur arratsaldean ere– zozketarako txartelak erostea izango da, eta azokaren antolatzaileek txartelak erosteko deia zabaldu dute, zozketa horrekin lortzen duten diruarekin finantzatzen dutelako feria.
San Pedron etzirako egin du deialdia Proisak. Santomasak antolatzen duten bigarren aldian, txistorra, gazta eta txokolatezko taloak salduko dituzte, eta artisauen saltokiak eta bigarren eskuko merkatua ere izango dira. Goizeko 11:30ean hasiko da festa San Pedron, herriko txistulari eta trikitilariek girotuta. Herritar guztiei luzatu diete parte hartzeko gonbitea.
