Anjel Mari Elkano: "Erasoei aurre egin behar diegu, herri gisa erantzunez"
Atxiloketak salatzeko elkarretaratzea egin zuten atzo Errenteria-Oreretan. Hasiera batean, 04/08 sumarioko auzipetuei babesa emateko deituta zegoen ekitaldia, baina atzoko operazioak aldarazi zuen. Anjel Mari Elkano eta Eusebio Lasa auzipetuak izan ziren bertan.
Hasiera batean, 04/08 sumarioan auzipetutakoei babesa emateko deitu zuten atzorako elkarretaratzea, baina hamasei atxilotuei elkartasuna adierazteko bilakatu zen elkarretaratzea. Hamarnaka lagun hurbildu ziren Herriko Plazara. Gaur ere zita jarri dute, 19:30ean.
Protesta ekitaldian izan ziren Anjel Mari Elkano eta Eusebio Lasa auzipetuak, Madrildik etorri berriak zirela, epaiketa bertan behera geratu ondoren. Elkanok hartu zuen hitza, eta “ideia politiko batzuk defendatzeagatik” epaituko dituztela nabarmendu zuen. Atzoko polizia operazioa kalifikatzeko zein adjektibo jarri ez zekiela esan zuen, eta hiru abokaturen atxiloketaren lekuko izan zirela jakinarazi. “Sekulako bidegabekeria da, aukera handiak daudelako herri honek bere subiranotasuna lortzeko. Espainiako Gobernuak etengabe oztopatu nahi du hori”, salatu zuen.
Iazko Xake operazioa-ren ondoren, aurten Mate operazioa egin dute. Horren harira, Elkanok adierazi zuen “dirudienez, operazioak itxita daude”, baina ez da fio: “Horrelako operazioak gelditzeko, aurre egin behar diegu eta herri gisa erantzun”. Deia egin zuen “bakoitzak bere tokitik” borroka egitera, “herri honek merezi duen eszenatoki batera eramateko”.
“Je suis basque, Nous sommes basques” leloarekin bukatu zuen Elkanok, euren aurkako epaiketak noiz jarraituko duen ez dakitela gogorarazi aurretik.
‘Mate operazioa’ salatzeko elkarretaratzea
