Ipar Euskal Herriko euskara eta ikastolen egoera aztertuko dute etzi
Ur Gorostiaga eta Lander Garro izango dira Saretuz-ek antolatutako hitzaldian
Igandean ospatuko dute Lapurdi, Behe Nafarroa eta Zuberoako ikastolen jaia, Herri Urrats. Senperen izango da, ohi bezala, eta Axik ikastola lelopean egingo dute. Bildutako dirua Ziburuko (Lapurdi) ikastolari bideratuko diote, ikasturte hasieran bertako Herriko Etxearekin arazoak izan zituelako eta lursail pribatua erosi nahi dutelako.
Horren guztiaren harira, Errenteria-Oreretako Saretuz proiektuak hitzaldia antolatu du Ipar Euskal Herriko euskara eta ikastolen egoeraren berri emateko. Euskararen, ikastolen eta euskal kulturaren argiak eta itzalak izenburupean egingo dute, eta bertan Ur Gorostiaga Seaskako zuzendariak eta Lander Garro Hendaian bizi den idazle oreretarrak hartuko dute parte. Itziar Nogeras ariko da moderatzaile lanetan. Xenpelar Etxean izango da solasaldia, ostegunean, 19:00etatik aurrera.
Bestalde, Oarsoaldeko ikastolek (Bizarainek, Oreretak, Haurtzarok eta Pasaia-Lezo Lizeoak) autobusak antolatu dituzte Herri Urratsera joateko.