Alkartasunak antolatutako kultur hamabostaldia martxan da Pasai Antxon; asteburuan taldeko kide denek beren trebezia erakutsi dute taula gainean
Alkartasuna euskal dantza taldeako dantzariek urtero aurkezten dituzte herrian urtean zehar landutakoak. Helduen dantza taldeak egin zuen emanaldia larunbata arratsean, eta atzo, berriz, haurrek dantzatu zuten Gure Zumardian.
Euskal dantzen emanaldiekin nahikoa ez, eta gaur eta etzi, berriz, afrikar dantza ikastaroa izango da, bi egunetan 20:30etik 21:30era, azokan.
Bihar, aldiz, Badia eskolako Kontakatiluek ipuinak kontatuko dituzte, 18:00etan liburutegian, eta ostegunean, musika tresnak egiteko tailerra izango da Gure Zumardian, 17:00etan, Ttutti fruti txarangak girotuta.
Guzti guztiak, kultur hamabostaldiaren barruan antolatu ditu Alkartasunak.
Larunbatean, Sagardo Jaia
Hamabostaldiaren barruko unerik gorenetakoa, ordea, larunbatekoa izango da. XXII. Sagardo Jaia antolatu du Alkartasunak larunbaterako. 12:00etan hasiko da festa, sagardo erakustaldiarekin, eta dultzaineroak girotuta.
Arratsaldeko festa, berriz, 18:00etan hasiko da, nahiz eta ordu erdi lehenagotik hasiko diren edalontziak saltzen. Sagardoaz gain, pintxoak, eta sardinak zerbitzatuko dituzte, eta aurten berriz ere, herritarrek postre lehiaketara aurkeztutakoak dastatzeko aukera izango da.
Jaia girotze aldera, Lezoko Jaxkipe txarangak herriko kaleak alaituko ditu, eta ondoren gazte asanbladak antolatuta Ingo al deu? musika taldeak kontzertua eskainiko du gaztetxean.
Alkartasunako kideek postre lehiaketan parte hartzera deitu dituzte antxotarrak.
[nggallery id=65]