Ordezkaritza lortu duten gainontzeko taldeekin hitz egiten hasi da Irabaziz
"Errenteria bidezkoago, parte hartzaileago eta jasangarriagoaren alde" lan egiteko konpromisoa hartu du hautesle elkargoak
Hamar egun falta dira zinegotzi berriek euren karguak hartzeko, eta Errenteria Irabaziz hautesle elkargoa hasi bere lan ildoa markatzen. Adierazi dutenez, Errenteria-Orereta “bidezkoago, parte hartzaileago eta jasangarriagoaren alde” lan egiteko konpromisoa hartuko dute. “Gure aukera bozkatu zuten 3.518 herritarrek agindu hori eman ziguten. Eurek bihurtu gintuzten hirugarren indarra”, gaineratu dute. Babes hori eskertu du lau zinegotziko ordezkaritza lortu duen hautesle elkargoak.
Konpromisoa euren gain hartu, eta aurrera eramaten hasteko momentua orain dela uste du Irabaziz-ek. “Ez ginen jaio udal politikaren ikusle hutsak izateko; ez gara esperoan geratuko. Orain da aukera, guztion artean Errenteria herritarrentzako irabazteko”, zehaztu dute. Udalak gardentasuna, hurbiltasuna eta parte hartzea sustatuko duen dinamika bultzatuko dute.
Horrela, ordezkaritza lortu duten gainontzeko alderdiekin hitz egiten hasiko direla jakinarazi dute: “Bilera horien emaitza akordioak izan behar dute. Momentu oro herritarrak gertatzen denaren berri izan behar dute, herritarren beharrei erantzungo dien Errenteria bat eraikitzeko. Erantzun zehatzak momentu zehatzetan”. Irabaziz-en aburuz, “berdintasunerako eta justizia sozialerako Errenteria bat irabaz daiteke”. Udal berriak parte hartzea eta gardentasuna ezaugarri izan behar dituela uste dute, baita ingurumenarekiko errespetua ere.
