Maritxuk jai giroa ekarriko du Gaztaño auzora, ostiralean

Ohi bezala, egitarau oparoa prestatu du Gaztañoko jai batzordeak, eta aurten Lapurdi omenduko dute

2015/06/08

Maldatik ere gauzak jaurtiko dituzte aurten

Gaur zerua argi badago ere, ostiralean hodei beltz bat —gutxienez— paratuko da Gaztaño auzoaren gainean. Parasolik ez da atera beharko, Maritxuren jaitsiera ikusi nahi duenak behintzat. Aurtengo egitaraua ekitaldiz lepo bete du Gaztañoko jai batzordeak eta egongo da non goza. Jada klasiko diren eta bilakatzen ari diren ekitaldiak egingo dituzte. Parrandarako ekitaldiez gain, jarduera osasuntsuagoak ere egingo dituzte, hala nola, IV. Herri Krosa (izena emateko, hemen) eta estreinakoz egingo duten kronoigoera. Urtero bezala, herrialde bati aitortza egingo diote aurten ere, eta Lapurdi izango da. Hango enbaxadore pare bat izango dira ostiraleko kontzertuan. Asteburuko ekitaldiez gain, udako solstizioa ospatzeko prorroga egingo dute hilaren 23an. Sua piztuko dute Aramendiko zelaian eta musika eta jan eta edatekoak ez dira faltako. Hona hemen egitarau osoa: Ostirala, hilak 12

16:00etan: Futbito 4 txapelketa.
18:00etan: Kiki eta Moko pailazoekin jaien hasiera.
19:00etan: Maritxuren jaitsiera eta txupinazo zaratatsua.
Ondoren, buruhandiak, eta auzoko jaioberriei kamiseta bana banatuko zaie.
Jarraian, patata tortilla lehiaketa.
20:00etan: Iratxo iturria irekiko dute, bertako sagardoa dastatzeko.
20:00etan: Futbito 4 txapelketaren finala.
23:00etan: Gaztañorrock kontzertua: The Lookers (Ziburu), Broken (Donostia), Aski da (Errenteria-Orereta) eta Zezenaren Taldea (Baiona).
Gauerdian: Dj-ak gaztetxean.

Larunbata, hilak 13

10:30ean: IV. Herri Krosa, Topoko zuzenetik. Bukatzean, III. Haurren Krosa.
Sariak banatu eta gero, pintxo poteoa.
12:00etan: Gaztañoko lehen kronoigoera, plazatik Arramendiko kaskoraino.
16:00etan: Mus txapelketa Bukagaitz elkartean.
17:00etan: Haur jolasak.
18:00etan: Txiribila-Billarda jaurtiketa C aldapan. Plazan, guraso eta txikientzako Zumba.
21:00etan: Herri afaria, Kuxkuxtu txarangak animatuta. Menua: Entsalada, bakailu tortilla, saiheskia piperradarekin, gazta, intxaurrak, ogia, edaria eta kopa.
23:00etan: Dantzale Sound disko jartzaileak, gaztetxean. Ordu berean, plazan, Dj Bull.
Goizaldean, indarrak berreskuratzeko sorginen edabe magikoa.

Igandea, hilak 14

12:00etan: Toka eta bote txapelketa.
14:00etan: Gazte izandakoen omenezko bazkaria, aurreko jaietan egindako lana eskertzeko.
16:00etan: Apar festa eta uraren jaia.
18:30ean: Gaztañotik mundura. Musika, dantza, janari eta edariak, dena beste tokietatik ekarritakoa.

Asteartea, hilak 23 (Sorginen Gaua)

17:00etan: Haurrentzako herri kirolak, Arramendiko zelaian.
Arratsaldean zehar, sardinak, txorizoa, saiheskia txosnan.
Iluntzean, ikuskizuna, sua piztea eta bideo emanaldia. Ondoren, zezensuzkoa.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.