Munduko Arrozak ospatuko dute larunbatean, hegoaldera begira

Hamar herrialdetako ordezkariak eta lau elkarte ariko dira arrozak prestatzen, Gamon Zumardian

2015/06/10

Gaur aurkeztu dute Munduko Arrozak

Laugarren urtez jarraian, Munduko Arrozak jaialdia antolatu du SOS Arrazakeriak. Larunbatean egingo dute, Gamon Zumardian jarri duten karpan. Jaialdia 11:00etan hasiko da, arrozen prestaketarekin. Hala ere, arroza egosi eta osagarriak prestatzen dituzten bitartean, musikarik ez da faltako. Gainera, 12:30ean kantu jira pasako da bertatik. Ordu horretan, gainera, Txintxarriko Javik, Tina Corcuerak eta Joaquin San Sebastianek osatutako epaimahaiak platerak probatuko ditu. Epaimahaikideek euren lana egin ondoren, 13:00etan, herritarrek dastatu ahal izango dituzte prestatuko arrozak. Bi euroren truke salduko dituzte platerak, eta nahi —edo ahal— adina jan ahal izango dute. 13:45ean, berriz, hiru arroz onenak zeintzuk diren jakinaraziko dute. Jaialdia ixteko, bertso saioa egingo dute. Arrozak prestatzen ariko dira 10 herrialdetako kideak. Honakoak izango dira: Kuba, Ghana, Honduras, Nepal, Nikaragua, Nigeria, Pakistan, Paraguai, Dominikar Errepublika eta Senegal. Bestalde, elkarteak lau izango dira: Aljarafe, Batasuna, Mikelazulo eta Kolore Guztiak.

Arrozak harago

Munduko Arrozak jaialdiaren helburua da etorkin berrienak bertan bizi direnekin konektatzea, SOS Arrazakeriako Gerar Carrereren arabera. Hala ere, udalerritik harago ere begiratzen dute. Horrela, Europako hegoaldeko mugaren —Mediterraneo itsasoa eta Ceuta zein Melilla— egoera nabarmendu nahi dute. Iaz bertan 3.000 hildako egon zirela salatu dute, eta Europako Batasunean %24 igo zirela asilo eskaerak. “Politikarien lengoaiak gehiago azpimarratzen du segurtasunean eskubideetan baino”, gaineratu du. Horregatik, eskubideei arreta gehiago jartzea eskatu dute. Gainera, lanerako bisatu gehiago ematea ere galdegin dute. Gudetatik —Siria, Afganistan, Irak— ihes egiten duten errefuxiatuez gain, Eritreako kasua nabarmendu du Carrerek: “Soldaduska mugagabea da, eta hortik ihesi gazte asko etortzen dira”. Gerra eremuetatik hurbil dauden Turkia eta Libanok milioi bat errefuxiatu jaso dituzte, eta “friboloa” iruditzen zaie EUropako Batasuneko herrialdeen jarrera: “25.000 lagun nola banatu eztabaidatzen dute”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.