Arbelaitz: "Ideia politikoak dira konfiskatzen direnak"

Herriko tabernen auziaren epaia salatzeko elkarretaratzea egin zuten Landare elkartearen aurrean

2015/06/19

Landare parean egin zuten elkarretaratzea

Espainiako Auzitegi Gorenak atzo jakinarazi zuen Herriko tabernen auziaren epaia, eta bertan 107 herriko taberna konfiskatzea ebatzi zuten, baita hainbat laguni urtebete eta hiru hilabeteko kartzela zigorra ezartzea. Tartean da Idoia Arbelaitz oreretarra. Erabaki hori salatzeko elkarretaratzea egin zuten atzo arratsaldean, konfiskatu nahi duten elkartearen parean. Hamarnaka herritar hurbildu ziren, tartean EH Bilduko eta Irabaziz-eko zinegotziak. Elkarretaratzearen bukaeran Arbelaitz berak hartu zuen hitza. “Jazarpen judiziala ondasunen konfiskaziotik harago doa Ez da taberna edo elkarte bat konfiskatzen, ideia politikoak dira konfiskatzen direnak. Konfiskatzen direnak erraldoiak, bertsogintza, dantza, kultura, madalenak, santomasak… dira. Elkarte honek 32 urte dauzka, eta herriko jende askok bere bizitza, bere orduak, bere gogoa eta bere ilusioa utzi du urte horietan guztietan”. Arbelaitzek salatu zuenez, 1936ko Gerratik “jasandako konfiskaziorik handiena” da, eta horren aurrean, ezker abertzaleak Euskal Herri “aske, euskaldun, parekide eta sozialista eraikitzeko bidean” jarraitzen duela adierazi du. “Gure herri hau bidea egiten ari da, eta bidea egiten jarraituko du, guztiaren gainetik. Datozen egunetako mobilizazioetan parte hartzera gonbidatu ditu herritarrak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.