Suak iluna garaituko du, zerua kez betetzen den arte

San Joan bezpera da gaur, eta horren harira hainbat su antolatu dituzte

2015/06/23

Gaztañon Sorginen Gaua egingo dute beste behin

Gaurko urteko egunik luzeena bezala kontsideratzen da. Aurten, baina, igandeari egokitu zitzaion ohore hori. Hala ere, gaur San Joan Bezpera izanik, suak pizteko usadioari eutsiko diote, gauari orduak kendu eta egun argia luzatze aldera. Keak zerua estaltzen duen arte. Errenteria-Oreretan hainbat auzotan jarri dituzte zitak. Fanderian, esaterako, auzoko jaiei agur esango diete gaur. 18:30ean Gorritiren animaliekin gozatzeko aukera izango dute haurrek. 20:00etatik aurrera, Dj Gudek musika jarriko du, eta 22:00etan hasiko da giroa —ziur— berotzen, orduan piztuko baitute sua. Ordubete beranduago zezensuzkoa ibiliko da, eta gauerdian agur esango diete festei, agur txupinazoarekin. Su pizte solemneagoa ikusi nahi duena Herriko Plazara hurbil daiteke. Izan ere, Ereintza dantza taldeak soka dantza egingo du 22:00etatik aurrera. Ez dira bakarrik egongo: udaleko hainbat ordezkarik azken egunetan entseatutakoa plazara eramango dute. Arramendi kaskoaren magalean ere sua piztuko dute urte honetan zehar pilatutako egurrarekin. Sagardoa, saiheskia eta sardinak eskuratzeko aukera egongo da arratsean zehar, eta 22:45etik aurrera, ikuskizuna eskainiko dute, sua modu seguruan —ez duela bost urte bezala— piztu baino lehen. Sorginak ez ezik, suzko zezena ere agertuko da Gaztañotik. Jaien itxiera gaur gauean izango bada ere, batek baino gehiagok auskalo noiz arte jokatuko duen jaien luzapena. Txingarrek irauten dutena baino gehiago, ziur.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.