Aitzol Gogorza aske uztea eskatu dute ehunka lagunek, giza katean
Iztietako anbulatorioaren eta presoaren gurasoen etxearen artean 'Aitzol askatu' lelodun bandera pasatu dute eskuz esku
Gogorza-Otaegi familiaren etxean bukatu da giza katea.
“Hil ala biziko egoera”
Foru Plazara hurbildu dira, katearen bi muturretan eta tartean zeuden herritarrak, eta han ekitaldi txiki bat egin dute. Hitza hartu du Julen Mendoza alkateak, eta Gogorzaren kasuak udalean duen ibilbidea laburbildu du. Gogorarazi du preso gaixoen jaioterrietako alkateen batzordea izan zela. Gainera, Udalbatzak presoaren gaineko mozioa gehiengo osoz onartu zuela aipatu du. Mozio horri jarraituz, alkatea bera eta Aintzane Intxausti psikiatra Eusko Legebiltzarrean izan ziren presoaren egoeraren berri ematen. “Egunero entzuten dugu Aitzolen egoera zein den”, esan du alkateak, “baina psikiatraren eskutik entzuteak zirrara handiagoa sortzen du: Gogorra da esatea, baina egoera hil ala bizikoa da”. Gaineratu duenez, “herriak, duintasunagatik eta bakegintzagatik, ezin dugu egoera hori onartu”. Gogorza aske uzteko lanean jarraituko dutela iragarri du, eta “Aitzol etxera!” oihukatu du kioskotik jaitsi baino lehen. Alkatearen hitzen ondoren, Arrate Arozenak, gitarra eskuan hartuta, abesti bat eskaini dio presoari. Sareko partaide Maialen Arenaza eta Arrate Manzisidor igo dira, euskaraz eta gazteleraz, antolatzaileen izenean testu bat irakurtzera. Sare orain dela urtebete inguru sortu zela gogorarazi dute, “presoen eskubideen defentsan aritzeko. Urraketak egitate bat direnez, horiek salatzen jarraitzen dugu”. Horrela, gaurko giza katean “ideologia ezberdinetako ehunka pertsonek” Gogorzaren egoera salatu dutela nabarmendu dute, eta bere kasuaz gain, honako egoeran daudenak askatzeko galdegin dute: “Dispertsioa, larri gaixo dauden presoak, hiru laurdenak beteak dituztenak eta 70 urtetik gora dituztenenak”. Dei egin dute “denen artean urraketekin bukatzea, eta presoek euren eskubideak aitortuta izateko” lan egitea. [nggallery id=97]
