Ikasturteko azken elkarretaratzea egingo du Duintasunak, beste hainbat eragilerekin batera. Pentsiodunen artean "zerbait mugitzen" ari dela uste dute.
Ikasturteko azken elkarretaratzea egingo du Duintasunak
Datorren astelehena, hilak 6, Duintasunak, hainbat erretiratuen elkarte eta eragilerekin batera, manifestazioa deitu du. Herriko Plazatik abiatuko da, 11:00etan, eta “autonomia pertsonala” eta arreta “publiko, unibertsal, euskaldun eta kalitatezkoa” bermatzen dituen lege propio baten aldarria egingo dute.
“Helduok eta pentsiodunok hainbat aberastasun sortu ditugu kalitatezko zahartzaro baten eskubidea izateko, bizi garen inguruan autonomia eta soziala emango diguna”, esan du Duintasunak. Sortuko zaizkien dependentzia mailei aurre egiteko, administrazio publikoak “arreta profesionalizatu eta euskaldun bat” eskaini behar dutela aldarrikatu dute.
Salatu dute estatuko zein Hego Euskal Herriko gobernuek pertsonen bizitza itxaropenak okertu egin dituztela, “lege murriztaileak” eginez. “Pentsio eskubidea izateko lan egiteko adina gehitu da, eta jubilatze sariak murriztu egin dira; osasun eta arreta zerbitzuak pribatizatzen ari dira…”, zehaztu dute. Espainiako Gobernuak onartutako Dependentzia Legea euskal herrialdeetan irizpide ezberdinekin aplikatzen dela gaineratu dute: “Ez du bermatzen pertsonen arreta profesionalizatua; balorazio sistema zerbitzu mediko probatuen irizpide subjektiboan dago… Legearen arabera, denok daukagu eskubidea zaindu eta zainduak izateko”. Horregatik, Euskal Herrirako lege propioa eskatu dute, “babesa modu berdinean bermatuko duena”. Honakoak dira Duintasunaren eskakizunak:
- Aukera berberak medikuen tratamendu aurreratuenak jasotzeko.
- Sendagaiak doan jasotzeko aukera berberak.
- Dependentzia Legea dagoen estamentuetan helduen udal kontseiluen parte hartzea.
- Etxetik gertu zaharren egoitzan plaza publikoa izateko aukera.
- Pertsona helduak beren inguru sozialean tratatzea, duintasunez, eta ahal den denborarik gehienean, haien autonomia pertsonala erabat zainduz.
- Beren gaitasunak murriztuak dituzten pertsona helduen aurka tratu txarrak eta biolentzia erabiltzearen kontra agertzen gara.
Gainera, gizarte zerbitzuak pribatizatzearen aurkako jarrera berretsi dute, “kalitatea murriztu eta garestitzen dutelako”. Duintasunak adierazi duenez, “zerbitzu on bat bermatzeko 80 eta 100 profesionalen arteko ratio bat behar da 100 egoiliarrentzat. Orain 30 eta 45 bitartean dago”.
“Zerbait mugitzen ari da”
Ikasturte honetako balantzea egin du Duintasunak. Hileko lehen astelehenetan elkarretaratzeak egin dituzte, eta hainbat hitzaldi antolatu dituztela gogorarazi dute. Dependentzia Legeari eta gizarte zerbitzuei buruzko solasaldiak izan dira. Gainera, Donostiako farmazia batean “
simpa” —pagatzeke utzi— sinbolikoa egin zuten. Hainbat eragilerekin elkarlanean aritu direla gogorarazi dute, eta gutxieneko batzuk adostu dituztela nabarmendu du Duintasunak: kopagoaren aurka edo gutxieneko pentsioen alde, besteak beste. “Zerbait mugitzen ari da”, esan dute.
Urriaren 1ean Pertsona Helduen Nazioarteko Eguna ospatzen da, eta horren harira, Gipuzkoa mailako manifestazio bat egiteko asmoa dute.
