Publikoari itxiak egoten diren Aizpitarteko kobak ezagutzeko irteerak egingo dituzte

Uztailaren 19an eta abuztuaren 30ean Aizpitarteko 4 eta 3 leizeak ezagutu daitezke, eta hil horien 18 eta 29an 2.a ere.

Publikoari itxita egoten diren leizeak ezagutu daitezke

Publikoari itxita egoten diren leizeak ezagutu daitezke

Felix Ugarte Espeleologia Elkarteak, Errenteriako Udalaren eta Gipuzkoako Parketxe Sarearekin, Aizpitarteko kobazuloak ezagutzeko irteerak antolatu dituzte. Elkarteko adituak zein Jesus Tapia arkeologoa izango dira bisita horien gidariak. Tapiak kobazuloaren azken indusketetan hartu du parte. Orain 27.000 urteko gizakiek erabiltzen zituzten kobak ezagutzeko aukera egongo da. Euskal Herri osoan, Paleolitikoko lehen arrastoak aurkitu zituzten lehenengo kobazuloak izan ziren. Bertan Jose Miguel Barandiaran eta Jesus Altuna bezalako arkeologoak aritu ziren. Haien urratsak jarraitze aldera, lau txango egingo dituzte, bi zailtasun mailakoak. Honakoak dira:
  • Uztailaren 19an eta abuztuaren 30ean: Oinarrizko maila izango dute, eta nahi duenari zuzenduta. Listorretako informazio puntutik abiatuko dira, 10:00etan. Aizpitarte 4 eta 3 ikusiko dituzte —azken hori urte guztian itxita egoten da—. Behin barruan daudela, aurkikuntzen informazio zabala jasoko dute, baita saguzar eta troglodioen gainekoa ere. 10 urtetik aurrerako pertsonei zuzenduta dago Guztira hiru ordu iraungo ditu ibilaldiak. Helduek zortzi euro ordaindu beharko dute, eta 10 eta 12 urte bitarteko haurrek, bost.
  • Uztailaren 18an eta abuztuaren 29an: Zailtasun maila 2. mailara igotzen da orduko ibilaldiekin, eta antolatzaileek “ausartentzako” direla esan dute. Aizpitarte 4, 3 eta 2 ezagutuko dituzte. Azken hori ere publikoari itxita egoten da, eta lau metroko eskala batetik jaitsi beharko da. Listorretatik abiatuko dira, 09:30ean, eta hiru ordu iraungo ditu. Hamasei euroko kostua izango du.
Antolakuntzaren esku geratuko dira kaskoa, argiteria eta eskularruak. Uretako oinetakoak eta aldatzeko arropa eramatea gomendatzen dute antolatzaileek. Izena emateko 943 49 50 69 telefono zenbakira deitu behar da. E-posta bidez ere egin daiteke.
Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.