Maiatzaren 31 arte entrega daitezke lanak. Festetako irudiarenaz gain, beste lau sari banatuko dituzte.
Xanistebanetako txupinazoa
Lau hilabete baino gutxiago falta da xanistebanak hasteko, eta festak iragarriko dituen kartelaren bila ari da Oiartzungo Udala. Urtero bezala, lehiaketa abiarazi du, eta maiatzaren 31ko 13:00ak arte aurkeztu ahal izango dira lanak, udaletxeko Informazio Bulegoan.
Baldintzei dagokienez, kartelak 70×50 zentimetroko neurria izan behar du, eta
Xanistebanak 2016 leloa idatzita eraman behar du. Nahi dutenek har dezakete parte, eta marrazki bat baino gehiago bidal ditzakete.
Bost sari banatuko dituzte. Alde batetik, irabazle absolutua. Xanistebanetako irudia izango da karteletan, egitarauan eta Oiartzun 2016 urtekarian. 600 euro jasoko ditu. Bestetik, oiartzuar onenak 300 euro poltsikoratuko ditu. Bi akzesit egongo dira, eta bakoitzak 50 euro eramango ditu. Margosororako urte osoko bekarekin ere sarituko dute.
Epaimahaia pinturaren munduan aritzen diren oiartzuarrek osatuko dute, Jai Batzordeko kideek lagunduta. Kartelean, berdintasuna bermatzeko irizpideak kontuan hartuko dituztela jakinarazi dute.