Gipuzkoako Lehen Mailarako txartela lortu dute areto futbolekoek. Saskilagunek ezin izan zuten irabazi eta Oiartzungo neskek itxoin egin beharko dute.
Jon Zamora kapitaina, merezitako kopa jasotzen (Argazkia: Jon Ander Etxabe).
Denboraldiari bukaera ezin hobea eman dio Oiartzungo Power Rangers areto futbol taldeak. Larunbatean, Gipuzkoako areto futboleko finalak jokatu zituzten Aretxabaletan, eta tartean ziren oiartzuarrak. Cecilia Frutadenda Kebab Lasarterekin nor baino nor aritu ziren, Gipuzkoako Lehen Mailara igotzeko txartela emango zuen partidan.
Areto futbolean ez ohiko emaitzarekin iritsi ziren norgehiagokaren bukaerara: 0-0. Ez zen partida gogorra izan, aukerak sortu zituzten bi taldeek, baina baloiak ez zuen sarerako biderik topatu. Partidan falta izan zitzaien punteria izan zuten oiartzuarrek penaltietan. Hirurak sartu zituzten, eta lasartearrek lehenengoa bakarrik asmatu zuten. Beraz, momentu honetan, Power Rangers 1896 Gipuzkoako Lehen Mailako taldea da.
Oiartzungo Saskilagunak taldeak, berriz, ezin izan zuen mailaz igo. Itzuliko partida jokatu zuten atzo Elorsoron, eta lau puntuko aldeari buelta eman behar zioten. Ez zuten partida irabaztea lortu, eta 50-53 galdu zuten Grupo Eme Oiarsoren kontra. Datorren denboraldian izan beharko du.
Oiartzungo neskak, itxarotera
Oiartzun-Levante
Bestalde, Oiartzungo futbol talde nagusiak maila matematikoki eusteko itxoin beharko du. Izan ere, atzo 0-1 galdu zuen Karla Lekuonan, Levanteren kontra. Valentziarrek lehenengo minutuan sartu zuten gola, Sheila Guijarroren erremate bati esker. Bi taldeek aukerak izan zituzten lehenengo zatian, baina ez zuten atea zulatzea lortu. Bigarren zatian Levante izan zen nagusi, baina Oiartzunek ongi defendatu zuen Oihanaren atea.
Jon Alkortaren taldeak hamabi puntu ateratzen dizkio Oviedo Modernori. Beste hainbeste puntu daude oraindik jokoan, eta puntu bakarra lortu behar dute Emakumeen Lehenengo Mailan beste urte batez lehiatzeko.
Oiartzun Kirol Elkarteko gainontzeko taldeei dagokionez, futboleko Ohorezko Erregional Mailakoek 2-1 galdu zuten Tolosan. Bigarren taldea, berriz, 1-3 gailendu zen Elgoibarren. Azkenik, areto futboleko taldeak 4-7 irabazi zuen Miranda de Ebron.
