Sei palista onenek badute euren txapela

Euskal Herriko Pala Txapelketa Irekiko XII. ekitaldiko hiru mailetako finalak jokatu dituzte Madalensoron.

2016/05/16

Finalera iritsi ziren palistak, erakundeetako eta Giriziako ordezkariekin.

Kitto. Euskal Herriko Pala Txapelketa Irekiaren XII. ekitaldia bukaerara iritsi da. Larunbata arratsaldean Madalensoron jokatu zituzten hiru finalak. Ikusle ugari bildu zen harmailetan, eta animorik ez zitzaien falta sei palistei. Lehen finalean, hirugarren mailakoan, Alegria eta Segurolak nagusitasun handia erakutsi zuten, 25-13 bukatu baitzen partida. Beloki eta Santamariak osatutako bikotea izan zuten arerio, eta Santamaria atzelariaren lesioa nabaritu zen jokoan. Bigarren mailako finala askoz orekatuagoa egon zen. Aroztegi eta Matiasek bi tantogatik garaitu zituzten Epelde eta Azpiroz. Partida oso irekia izan zen, eta edozein bikotek eraman zezakeen txapela. Lehen mailako finala ere oso orekatua izan zen, nahiz eta bukaerako markagailuan bi bikoteen arteko aldea handiagoa izan zen. Ordu eta erdiko partida izan zen, emozio handi eta joko politekoa. Arriaga eta Antxordokik 25-18 irabazi zuten maila nagusiko partida. Kantxako lanak bete ondoren, sari banaketa egin zuten. Bertan izan ziren Gipuzkoako eta Euskadiko pilota federazioen presidenteak, udaleko zein Girizia elkarteko ordezkariak baita txapelketak oroitzen duen Josetxo Gamioren senideak ere. Hiru hilabete iraun ditu txapelketak, 113 partida jokatu dituzte parte hartu duten 70 bikoteek. Datorren urtekoari begira hasi direla jakinarazi dute Girizia elkarteko pilota saileko ordezkariek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.