VII. Erremonte Kopako finalaurrekoa jokatuko dute igandean Agustina Otaola pilotalekuan Urriza-Zaldua eta Segurola-Endika bikoteek.

Erremonte Kopako finalaurrekoaren aurkezpena.
Gipuzkoako Foru aldundiaren 2016ko Sariaren barruko VII. Erremonte Kopako finalaurrekoa jokatuko dute igandean Agustina Otaola pilotalekuan. Jaime Agirre Erremonte Elkarteko kideak “partida parekatua” izango dela esan du baina izango diren lau erremontisten artean Urriza nabarmendu du, “momentu onean dugu, oso ondo ari da, eta igandekoa maila handiko partida izango da”. Zalduarekin ariko da Urriza, eta arerio izango dituzte kantxan Segurola eta Endikak osatutako bikotea.
Erremontearekin batera eskupilota partida ere izango da 11:30ean hasiko den jaialdiaren barruan. Urmeneta-Lizaso bikotea Taberna-Aranbururen kontra ariko da. “Herrian baditugu pilotari onak eta horiek jokatzen ikusteko aukera izango dugu igandean ere”, esan du Jon Txasko Kirol zinegotziak. Jaialdiaren helburua pilota bultzatzea dela esan du Txaskok, eta horren harira sarrera doakoa izango da, “jendea pilotara hurbiltzea nahi dugu, igandean frontoia betetzea, eta horretara animatu nahi ditugu herritarrak”. EPLEri eskerrak eman dizkio egiten duen lanagatik.
Agirrek kanporaketa Pasaian jokatu zela martxoan, eta orduan frontoia bete zela ekarri du gogora, “espero dugu hemen ere beteko dela”. Erremonte Kopako Finala Zumarragan izango da hilaren 12an.