Urteroko sari banaketa egin zuen atzo Pasaiako merkatarien eta ostalarien elkarteak.
Aurten saritutako merkatarien talde argazkia, Antxoko azokan.
XVI. Laurak Bat Eguna ospatu zuten atzo Pasaian, eta eguerdian Antxoko Azokan, urteroko sariak banatu zituen herriko merkatarien eta ostalarien elkarteak.
Lehengo asteburuko pintxo eta erakusleiho lehiaketetako irabazleek jaso zuten saria, pozik. Aurten Mimos tabernak irabazi du profesionalen epaimahaiaren saria, eta Kamio tabernako pintxoa izan da herritarren gustukoena. Erakusleiho arrakastatsuenak, berriz, Elosegi Zeramika Denda, Fotocano eta Nerea Pinturak izan dira, hurrenez hurren.
Horrez gain, atzoko ekitaldian, Trintxerpeko eta Pasai Antxoko merkataritza eta zerbitzu-sektoreko hainbat establezimendu omendu zituzten. Aurten Antxoko Visual Grafic, eta Decoro dendek, eta Trintxerpeko Lema paper dendak, eta Biyok optikak jaso dute aitortza.
Aurtengo berritasun nagusia, edonola ere, Pasaian euskararen normalizazioren alde lan egiten duten establezimenduak saritzea izan da. Pasaiako alkateorde Nahikari Oterminek eman zuen saria, eta Urdin paper dendako jabeak jaso zuen, euskara ikasten ari diren merkatari eta ostalari guztien izenean.
Sariak entregatuta, pintxo lehiaketan saritutako mokaduak probatzeko aukera izan zuten ekitaldian bildutako denek.