Zarata mapa aurkezteko parte hartze prozesua abiatuko du udalak
Herritarren kezka eta arazoak jaso nahi ditu udalak bilera horien bidez, izan ere, ekarpen horiekin osatuko da zarata mapa, eta bere onarpenaren tramitazioari ekingo diote.
Errenteria-Oreretako zarata mapa egingo du udalak. ACC Centro de Acustica Aplicada enpresak egingo ditu lan horiek, eta dagoeneko zarata maparen azterlana egin du. Azterlana herritarrei aurkeztu nahi dio udalak eta horretarako hainbat bilera deitu ditu. Udaletxeko areto nagusian izango dira bilera horiek auzoka, 19:00etan hasita, eta herritar orok hartu ahalko du parte. Herritarren kezka eta arazoak jaso nahi ditu udalak bilera horien bidez, izan ere, ekarpen horiekin osatuko da zarata mapa, eta bere onarpenaren tramitazioari ekingo diote.
Bileretarako jatorri bereko zarata jasaten duten eremuetako auzoak biltzen saiatu direla esan du Jose Cruz Legorburu, Ingurumen zinegotziak. “Kutsadura akustikoarekin sentsibilizatutako pertsona guztien artean izango ditugun bilerekin, udalerriko hobekuntza akustikorako ekintza plana egiteko estrategia definituko dela pentsatzen dugu”, gaineratu du.
Bilerak auzoka
- Hilaren 15ean, asteazkena: Agustinak, Gaztaño, Fanderia, Lartzabal, Beraun eta Pontika.
- Hilaren 16an, osteguna: Erdialdea, Olibet, Iztieta eta Etxeberrieta.
- Hilaren 29an, asteazkena: Galtzaraborda, Igantzi, Kaputxinoak eta Alaberga.
