Harresirik gabeko lurraldeen aldeko kontzertua emango du Zariak, bihar

Migrazioaren fenomeno berria azaltzeko Harresirik gabeko lurraldeak proiektua sortu dute. Abuztuan Lampedusara joango dira, hango berri izatera.

Erik Gartzia Egaña

Errenteria-Orereta

2016/06/21

Errefuxiatuen aldeko eta Europaren aurkako neurrien elkarretaratzea atzo.

50 elkartek deitu zuten apirilaren 18ko elkarretaratzera.

Mikelazulo Kultur Elkartea buru belarri sartuta dago Harresirik gabeko lurraldeak izeneko proiektuan. Pasa den apirilaren 18an hasi ziren herria sentsibilizatzen, Lampedusako mosaikoaren aurrean egindako elkarretaratzearekin. Italiaren administraziopean dagoen uharte horretara joaten zen itsasontzi bat hondoratu zen 2015ean, eta 700 migrante hil ziren. Elkarretaratzea egin zen egun berean, beste ehunka etorkin hil ziren modu berean. Migrazio fenomenoak azaldu nahi ditu Harresirik gabeko lurraldeak egitasmoak, eta horretarako, sakoneko arrazoiak aztertu dituzte: Afrika, Amerika eta Ekialde Hurbilean sortzen dituzten gerrei, lurren espekulazioari eta aldaketa klimatikoari egozten diote. Euren herrialdeetatik ihes egin behar duten pertsonei, gainera, Europak ateak ixten dizkie. Hori salatu, eta bide batez, etorkinei elkartasuna adierazi nahi diete proiektuarekin. (Manifestua irakurtzeko: Harresirik gabeko LURRALDEAK). Ekitaldiak Harresirik gabeko lurraldeak-i babesa emateko, Oarsoaldeko hainbat eragilek euren atea jo dute. Esaterako, Oarsomusikak eta Ertik. Zaria koru eskolak bihar emango duen ikasturte bukaerako kontzertua proiektuaren aldekoa izango da. Fatimako parrokian izango da, 20:00etatik aurrera. Datorren asteartean, berriz, EMKEren bandak eta Badut antzerki taldeak Zirriborroak antzezlan musikatua taularatuko dute. Niessen aretoan izango da, 20:00etatik aurrera. Abuztuaren bukaeran proiektuko kideak Lampedusa uhartera joango dira, babesa eta elkartasuna ematera. Hori alde batetik. Bestetik, han bizitakoa eta ikusitakoa transmitituko dute bueltatzerakoan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.