Udan ere zerbitzuak euskaraz emateko baliabideak izango dituzte merkatari eta ostalariek
Merkealdirako kartelak eta menuak euskaratzeko edo zuzentzeko zerbitzuak eskainiko ditu Ttur-ttur eta udalaren arteko elkarlanak.
Ttur-ttur Euskaltzaleon Bilguneak eta Oiartzungo Udalak herriko merkatari eta ostalariak animatu nahi ditu, udan ere, euskarazko zerbitzua eman dezaten. Horretarako, hainbat baliabide eskainiko dituztela gogorarazi dute. Bereziki, merkealdia jartzen duten dendei eta otordua eskaintzen duten ostalariei eskaini diete.
Hurrengo ostiralean, uztailaren 1ean, hasiko da merkealdia, eta dagoeneko merkatariei bidali diete euren zerbitzuak gogorarazten dituen eskutitza. Euskaraz idatzitako hainbat material eskainiko dute Ttur-ttur eta udalak: Merkealdia edo Eskaintzak idatzita duten kartelak, prezio zaharra eta berria erakusten duten txartelak, ehunekoen txartelak, deskontu baleak, fakturak edo ordainagiriak egiteko taloitegiak.
Menua euskaratu
Ostalarien kasuan, menuak eta kartak zuzentzeko edo euskaratzeko laguntza ere eskainiko dute. Horrez gain, menua eta karta euskaraz duten ostalariei Jatetxe honetan menua euskaraz dioen bereizgarria emango diete.
Merkatari eta ostalariren batek gutunik jaso ez badu, eta zerbitzua jaso nahiko balu, Ttur-tturren Euskaltzaleon Bilgunearen egoitzara jo beharko du. Fermiñenera joan ezin duenak, telefono —943 26 01 82— edo e-posta bidez jarri daiteke harremanetan.
Zerbitzu guztiak dohainik emango dituzte, establezimenduaren “kalitatea hobetu eta bezeroarekiko begirunea” areagotzen duelako.
Merkealdia eskaintzen duten dendek kartelak jasoko dituzte.
