Pankartan, indarkeria matxistal hil dituen azken lau emakumeen izenak: Marga, Karla, Cristel eta Enma. Haiek gogoan hasi dute protesta txilibitu hotsen artean eta indarkeria matxistaren aurkako oihu artean.
Pankartan, indarkeria matxistak hil dituen azken lau emakumeen izenak: Marga, Karla, Cristel eta Enma. Haiek gogoan hasi dute protesta.
Hamarnaka lagunek egin dute bat Oarsoaldeko Mugimendu Feministak gaur arratsaldean deitu duen manifestazioarekin. 19:30ean abiatu da Niessen merkatalgunetik. Pankartan, indarkeria matxistak hil dituen azken lau emakumeen izenak: Marga, Karla, Cristel eta Enma. Haiek gogoan hasi dute protesta txilibitu hotsen artean eta indarkeria matxistaren aurkako oihu artean. Herritar ugari eta ordezkari politikoak ere izan dira manifestazioan, tartean Julen Mendoza alkatea.
Amorruz salatu du mugimendu feministak 22 direla jada Espainiako Estatuan indarkeria matxistak hil dituen emakumeak: “urtarrilaren 27an bildu ginen 17 hilabeteko Aliciaren hilketa salatzeko. Apirilean berriz ere bildu ginen. Natalie 34 urteko emakumea hil zuen senarrak. Matxismoak beste lau hilotz utzi dizkigu orain Euskal Herrian. Lau gutxiago gara”.
Indarkeria sexistaz ezin dutela modu isolatu batean hitz egin gaineratu dute martxa amaieran, “hamaika aurpegi ditu, ahots, adierazteko forma eta esparru, hemen Euskal Herrian eta baita mundu osoan ere”. Indarkeria matxista lehen mailako arazo politiko, sozial, ekonomiko eta kulturala izaten jarraitzen duela esan dute, bestalde, eta azken lau heriotzak jendartearen antolaketa sexista baten ondorio direla salatu dute.
“Drogak baliatuta,
lau eraso izan direla Irunen jakin berri dugu. Amorruz betetzen digu horrek. Halakoen aurrean indartsuago bihurtzen gara, emakumeok ez gara kikilduko, ez gara ezkutatuko, kalera ateratzen jarraituko dugu”.
Erasoen aurrean ixilik ez geratzea eskatu dute azkenik eta prebentzioa eta erantzunean jarriko dutela indarra esan dute, “autodefentsan egingo dugu lan, gure auzo eta herrietatik erasotzaileak baztertzen jarraituko dugu. Beraiek ezkutatu beharko dute. Aski da, nazkatuta gaude”.
Txalo artean amaitu da manifestazioa Zumardian.