2017ko zergak arautzen dituen ordenantza onartu dute

Iraileko plenoan onartu dute ordenantza. Orokorrean, antzekoa izango da, baina aldaketa txiki batzuk egongo dira.

2016/09/29

Hamahiru zinegotziak izan ziren atzoko plenoan.

Ikasturte politiko berriko lehenengo ohiko plenoa egin zuten atzo. 11 puntu aztertu zituzten, horien artean 2017ko zergak arautzen dituen ordenantza. Orokorrean, aurtengo tasen antzekoak izango dira. Hala ere, egongo da aldaketarik. Horrela, aldundiak balio katastrala aldatu du, eta Oiartzunen nabarmen eragingo duela esan du jakinarazi zuen Jexux Leonet alkateak. Kontribuzioan, iazko diru kopuru bera jaso nahi dutenez, “herritarrengan ahalik eta eragin txikiena” izateko, etxebizitzen tasa jaitsiko dute, eta industriarena handitu. Horrez gain, lurraren balioagatik kobratzen den gainkarga —plusbalia— %8tik %9ra pasako da. Leonetek adierazi zuenez, eskualdeko gainontzeko udalerrietan baino txikiagoa izango da igoerak igoera. Uraren tasa ere %1 igoko da. Añarbeko Urak mankomunitateak gutxienez %3,5 igoko du tasa, baina udalak erabaki du igoera minimoa izatea. Gainera, ostalariek orain arte industriaren tasa bera ordaintzen zuten, eta sektoreko enpresek hala eskatuta, etxebizitzaren eta industriaren tarteko tasa izango dute. Familia Ugarien Elkartearen eskakizun bat ere kontuan hartu dute. Ibilgailuen hobariez gain, etxebizitzaren kontribuzioa ordaintzerako garaian, beste hobari izango dute: familiaren diru sarrerek 70.000 euro ez gainditzea. EH Bilduren aldeko botoekin atera zen aurrera 2017ko zergak arautzeko ordenantza. EAJ abstenitu egin zen. Parisko Deklarazioarekin bat Beste gaiei dagokienez, Gehitu elkarteak aurkeztutako eta EH Bilduk babestutako HIES eta GIBari buruzko buruzko mozioa aztertu zuten. Parisko Deklarazioarekin bat egitea proposatzen du mozioak, eta hainbat neurri martxan jartzeko konpromisoa hartuko du udalak, 2030erako epidemia izan ez dadin. [Mozioa irakurtzeko, sakatu esteka]. Aho batez onartu zuten mozioa, gainontzeko puntuak bezalaxe. Horrez gain, alkateak esan zuen urrian jarriko dela hondakinak egoki kudeatzea aztertuko duen batzordea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.