Urriaren 11n hasiko da Oiartzungo Garagardo Festa, eta bost egun iraungo ditu. Jateko eta edatekoez gain, hainbat ekitaldi ere antolatu dituzte.
Garagardo pitxarrak dantzan ibiliko dira urriaren 11tik 15era.
Atzo bukatu zen Municheko (Alemania) Oktoberfest, garagardoaren inguruan egiten den munduko festatik handiena. Hamazazpi egun iraun ditu, eta dozena erdi bat milioi litro banatu zituzten Bavariako hiriburuko Theresienwiese gunean.
Askoz apalagoa da Oiartzungo Garagardo Festa. Aurten hamabigarren ekitaldia egingo dute, eta Municheko iraupenaren bila joango dira Oiartzunen: bost egunez egongo da Garagardo Festa Done Eztebe plazan.
Urriaren 11n, asteartearekin, hasiko dira hamasei garagardo iturriak likido horia botatzen, eta larunbat goizaldera arte egongo da tragoak hartu eta Alemaniako gastronomia dastatzeko aukera. Karpa 19:00etatik 01:00era egongo da irekita —asteazkenean eta larunbatean ordubete lehenago irekiko dute—, eta egunero 22:00etatik 23:00etara egingo duten zozketan 60 sari baino gehiago banatuko dituzte.
Ostegunean
pintxo-prost egingo dute eta larunbatean haurrentzako puzgarriak izango dira, baita txokolate jatea ere.
Horrez gain, hainbat ekitaldi antolatu ditu Laia tabernak Oiartzungo Garagardo Festa are gehiago girotzeko. Honakoa izango da Landetxe plazan egingo diren ekitaldien egitaraua:
- Urriaren 12an: Haurtzaro euskal dantza taldea, 12:00etatik 13:00etara.
- Urriaren 13an: Pintxo-pote alemaniarra, 19:00etan.
- Urriaren 14an: The Crockets, Beatles taldearen tributu banda, 19:30ean.
- Urriaren 15ean: Ibargain Musika Eskolako Bat Batean taldea, 12:30etik aurrera.
