Bakoitzaren beldurrak uxatuko dituzte Gau Beltzean
Abaraxka udal ludotekak hirugarrenez antolatu du Gau Beltza. Astelehenean egingo dute, eta larunbatean prestatzeko geratu dira.
Abaraxka udal ludotekak hirugarren aldiz antolatu du Gau Beltza, hilaren 31ko arratserako. Oiartzungo baserrietako haur eta gazteek duela hamarkada dezente egiten zen ohi zuten ohitura berreskuratu dute Abaraxkakoek, eta astelehenean suaren bueltan bilduko dira berriro.
19:30ean jarri dute zita, Kontzejupe plazan. Sua piztuko dute orduan, Soinueneko txalapartari taldearen ttakun eta herrenak lagunduta. Afari-merienda egingo dute bertan, etxetik ekarritako janariarekin. Abaraxkako Nekane Martiarenak azaldu duenez, aurten bakoitzaren beldurrei garrantzia eman nahi diete. Horrela, bakoitzak bere beldurra zein den idatziko du papertxo batean. Horiek guztiak zakutan sartu eta sutara botako dituzte, uxatzeko asmoz.
Antzerki taldekoak iritsiko dira ondoren, eta kaskoko hainbat txokotatik zehar ibilbidea egingo dute, Goiatz Labandibar idazleak sortutako gidoitxo bat oinarritzat hartuta. Bertan istorio errealak sormen propioarekin uztartu ditu, eta HELTAko zein gazte tailerretakoek interpretatuko dituzte.
Hiru ordu laurden —gutxi gorabehera— iraungo ditu ibilbideak, eta plazan bukatuko da, suzko akerrarekin. “Emango duen argitasunak beldurrak uxatzeko balioko du”, esan du Martiarenak.
Prestaketa, larunbatean
Hilaren 29an, larunbata, Gau Beltza prestatzeko geratuko dira ludotekan, 16:30ean. Kontsumismotik at egoteko filosofia duen ospakizuna izanik, astelehenerako mozorroak eurek prestatuko dituzte, eta ludoteka pareko zuhaitza apainduko dute. Horrez gain, karrakak ere prestatuko dituzte, “isiltasunari zaion beldurra uxatzeko asmoz”.
