EH Bilduk kontra bozkatu du, eta Pasaiak Ahal Du eta atxiki gabeko zinegotzi Manuela Nicolas abstenitu egin dira.
Oposizioak EH Bilduren mozioa babestu arren, EAJk eta PSE-EEk aurkeztutakoa atera zen aurrera.
Oposizioaren babesik bada ere Pasaiako udal gobernu taldeak aurrera atera du 2017. urteko zerga ordenantzen aldaketari hasierako onarpena emateko proposamena. Atzo bildu zen udalbatzarra, Arizabalon, eta han bozkatu zuten tasa gehienak izoztea aurreikusten duen proposamena. EAJren eta PSE-EEren aldeko bederatzi botoak bildu zituen proposamenak.
Kontra EH Bilduk bozkatu zuen, koalizioaren zinegotzi Mikel Garcia Peñilek nabarmendu zuenez, “proposamenak ez duelako txosten teknikoen babesik”. “Inork ez dezala gaizki ulertu”, esan zuen, “ez gaude tasak igotzearen alde, baina proposamena babesteko beharrezko txosten teknikoak falta ditugu”.
Ondasun Higiezinen Gaineko Zergaz (OHGZ) hartutako erabakiak ere eman zuen zer esana. Aipatu zerga nabarmen igoko da aurten, aldundiak katastroaren baloiaz egin duen berrikuspena dela eta. Igoera hori arindu nahian gobernu taldeak proposatu du aplikatu ohi den portzentajea murriztea. Proposamena, baina, motz geratzen da EH Bilduren ustez. Pasaiak Ahal Du-k, aitzitik, “zeuden aukeren artean onena” hartu dutelakoan, abstentzioaren alde egin zuen, atxiki gabeko zinegotzi Manuela Nicolasen antzera.
Trenbideaz bi mozio aurrez aurre
Eguneko beste gaia, Altza Galtzaraborda arteko trenbidea berritzeko proiektua.
EH Bilduk proposatuta aipatu egitasmoa Donostiako igarobideari lehenesteko eskatuz mozioa eztabaidatu zuten. EAJk eta PSE-EEk, baina, mozio alternatiboa aurkeztu zuten atzo, plenoan bertan, Eusko Jaurlaritzari eta Euskal Trenbide Sareari eskatzeko, “Gipuzkoako Foru Aldundiarekin elkarlanean, Donostialdeko metroko jarduerak bultzatzeko, 2015-2019 Kudeaketa Plan Estrategikoan aurreikusitakoari jarraiki”.
Udal Gobernu Taldeak babestutako mozioa atera zen aurrera, EAJk eta PSE-EEk babestuta. EH Bilduk aurkeztutakoa ez zen onartu. Kontra bozkatu zuten, noski, EAJk eta PSE-EEk,eta alde, EH Bilduren zinegotziek ez ezik, Pasaiak Ahal Du-k eta atxiki gabeko zinegotzi Manuela Nicolasek.
PSE-EEren izenean eta EAJren ordezkari gisa nahikari Oterminek, “ongietorria” eman zion koalizio soberanistari “Donostialdeko metroaren defentsara batu izanagatik”.
EH Bilduren izenean, berriz, Haritz Perezek erantzun zuen eta halakorik ez zutela espero esan zien EAJren eta PSE-EEren kideei. “Bagenekien gai honetan zaila izango zela adostasunetara iristea zuen alderdiek gai honetan hartu duten bidea ikusita, baina halakorik ez genuen espero”. Pasaitarrentzat trenbidea lurperatzeko proiektua premiazkoa dela defendatu zuen Perezek, eta deitoratu zuen plana data jakinik gabe bazterrean utzi dutela jakinda haren defentsarako adierazpen bakarra atzoko mozioa izatea.
