Maiatzera arte hainbat film eskainiko dituzte. Lehenengoa Ciutat Morta izango da, hilaren 20an.
ZInegileak elkarteko eta udaleko ordezkariek aurkeztu dute bigarren zikloa.
Zinegileak Kultur Elkarteak antolatutako film zikloa aurkeztu dute gaur. Hilaren 20an hasi eta maiatzera arte, hilero saio bat egingo dute, bigarren aldiz. Saio horietara egileak gonbidatuko dituzte, eta eurekin solas egiteko aukera izango dute bertara joaten direnek.
Filmen emanaldi guztiak ostiral arratsean izango dira, udaletxeko pleno aretoan (19:00etan hasiko dira saioak; ikus behean zerrenda). Kultura zinegotzi Josune Cousillasek Zinegileak Kultur Elkartearen lana eskertu du, “herrian eta inguruan ikustea hain erraza ez diren lanak Oiartzunera hurbiltzeagatik”. Era berean, oiartzuarrak gonbidatu ditu, bertara joan daitezen.
Ciutat morta
Xavier Artigas eta Xapo Ortegaren Ciutat Morta dokumentala ikusteko aukera egongo da.
4F kasua izenekoa aztertu zuten 2013an egindako dokumentalean.
4F kasua 2006ko otsailaren 4an hasi zen. Bartzelonako udaltzainek eraikin okupatu bat hustu zuten, baimenduta ez zegoen festa bat egiten ari zirelakoan. Istiluak egon ziren, eta hainbat lagun zauritu ziren, tartean udaltzain bat. Lehenengo bertsio ofizialak zioen lorontzi bat erori zela teilatutik, eta horrek larri zauritu zuela. Hamar akusatuen defentsak baliozkotzat eman zuen bertsio hori.
Ondoren, baina, bertsio ofiziala aldatu eta kaletik botatako harri batek zauritu zuela esan zuten. Bederatzi lagun zigortu, eta lau kartzelan sartu zituzten. 2011an, Patricia Heras psikologoak kartzelatik irteteko baimen bat probestu zuen bere buruaz beste egiteko. Rodrigo Lanzak bost urte pasatu zituen espetxean, harria botatzea egotzita. Auzitegi-medikuek esan zuten ezinezkoa zela kaletik botatako harri batek inor tetraplejiko uztea. Gainera, atxilotuek torturak jaso zituztela salatu zuten. Kasu horren atzean daudenak kontatzen ditu dokumentalak.
Zikloa:
- Otsailak 24: I´m not from here (Maite Alberdi); Gure hormek (Maider Fernandez eta Maria Elorza); eta Homing (Xabier Iriondo).
- Martxoak 17: Beti Bezperako koplak (Ageda Kopla Taldea); Zepo (Cesar Diaz Melendez); Bird Boy (Pedro Rivero eta Alberto Vazquez); I said I would never talk about politics (Aitor Oñederra); eta Decorado (Alberto Vazquez).
- Apirilak 21: Pedalo (Juan Palacios).
- Maiatzak 12: Boye (Sebastian Arabia).
