Herri barruko garraio publikoa hobetu nahi du udalak, eta erabiltzaile eta ez erabiltzaile ez diren boluntarioen iritzia jaso nahi dute.
Xorrolak eskaintzen duen zerbitzua modu onean baloratzen dute oiartzuarrek.
Herri barruko garraioa hobetu nahi du Oiartzungo Udalak. Horregatik, oiartzuarren mugikortasun ohituren azterketa bat egiten ari da. Udalean batzordea eratu du, adituekin bildu dira, datuak jaso dituzte eta
herritarren artean galdeketa egin zuten urri inguruan hasita. Hori eginda, profil ezberdina duten herritarrekin elkarrizketak egin nahi ditu udalak.
Xorrola eta taxibusa erabiltzen eta ez duten oiartzuarren iritzia jaso nahi dute. Elkarrizketa saioak egingo dituzte, eta horietan parte hartzeko boluntarioen bila ari dira. Udalaren arabera, “euren iritzia azterketa osatzeko udalak aurrera begirako erabakiak hartzeko baliagarria izango da”.
Bi saio
Bi saio egingo dituzte. Lehena, hilaren 30ean, astelehena, 18:30etik aurrera. Bigarrena, berriz, otsailaren 1ean izango da, 18:00etatik aurrera. Bi kasuetan, udaletxeko pleno aretoan izango dira bilerak. Horrez gain, asteazkeneko saioan haurrak zaintza zerbitzua emango du Abaraxka ludotekak.
Ordu eta erdi iraungo dute bi saioek. Galdeketaren emaitzak aurkeztuko dituzte —”modu laburrean”, zehaztu dutenez—, eta segidan gaur egungo zerbitzuen balorazioa eta hobetzeko proposamenak jasoko dituzte.
Horretarako, profil ezberdinetako oiartzuarren bila ari dira: adinari dagokionez, nerabeengandik hasi eta zaharretaraino; auzo ezberdinetako bizilagunak; mugikortasun ohitura ezberdinak dituztenak… Udalak jakinarazi duenez, izena ematen dutenen artean aukeraketa egingo dute, mugikortasun ohituren azterketa egiteko ahalik eta jende multzo anitzena osatze aldera.
Saioan parte hartzeko prest daudenek Alkatetzara deitu beharko dute (943 49 18 62) edo Internet bitartez izena eman dezakete,
udalaren webgunean.
Galdeketaren emaitzak
206 oiartzuarrek erantzun zioten pasa den urtearen bukaeran egindako galdeketari. Desplazamendu gehienak herri barruan (%38) edo eskualdean (%22) egiten dituzte. Oiartzunen bertan, desplazamenduen bi heren Elizaldera egiten dituzte auzoetako biztanleek.
Desplazamenduen erdia baino gehiago (%53) ibilgailu pribatuan egiten dira. Herri barruan, garraio publikoarekin egiten mugimenduak %29 suposatzen dute.
Galdeketaren emaitzek esaten dutenez, herri barruko garraioaren erabilera handitzen ari da, eta erabiltzaile gehienak emakumeak dira. Gehienek Xorrola erabiltzen dute, eta hamar oiartzuarretik zazpik “oso ongi” baloratzen du garraio zerbitzua. Are puntuazio hobea ematen diote erabiltzaileek. Ibilbidea eta tarifa politika aldeko faktoretzat ditu autobus berdeak eskaintzen duen zerbitzuak, eta beste garraioekin lotura hobetu behar dela esan dute.
