Portuko trafikoa bederatzi puntu jaitsi da iaz

Guztira, 3,5 milioi tona mugitu ditu Pasaiako Portuak 2016an; gaur ospatuko dute zazpi milioi auto pasatu direla portutik.

olatz mitxelena

Pasaia

2017/01/25

UECCren ontzia, atzo arratsaldean, porturatzeko unean.

Iazko balantzea ez da positiboa, baina hala ere bada zer txalotu. Zazpi milioi auto mugitzera iritsi dela ospatuko du gaur Pasaiako Portu Agintaritzak, ekitaldi hantustean. Gonbidatu asko bilduko dira Eraikin Trasatlantikoan, eta haien hitzaldiak entzun ondotik UECCren terminala bisitatuko dute. Azkenik, mahaiaren bueltan bilduko dira ospatzera, sagardotegian. Trafikoen balantzea, baina, ez da esparru guztietan autogintzan bezain positiboa izan. Kontrako norabidean, txatarraren trafikoaren gainbehera, batez ere, Zumarragako Arcelor fabrikaren itxierak eraginda. Portu Agintaritzak itxiera horri egotzi dio trafikoaren %9aren jaitsiera. 994 ontzi Iaz 994 ontzik egin dute eskala Pasaian, 2015. urtean baino hiru gehiago. Trafikoan aldiz, 339.953 Tm-ko jaitsiera izan da. Positiboan, arrantza. Jarduera hau %18,7 handitu da. 27,55 milioi kilora iritsi dira lonjan, 84 milioi eurotik gorako balioa lortuz. Horregatik, Portu Agintaritzaren balantzea ez da guztiz ezkorra. “Portu Agintaritzak datu horien inguruan egiten duen balorazioak abiapuntu negatibo bat du, zalantzarik gabe; gure bezero nagusia zen Arcelor enpresaren planta baten itxiera”, esan dute. Baina, Portu Agintaritza ez dela “ezkorra” gaineratu dute “Portua hazten ari delako balio gehien duten trafikoetan”. Zentzu horretan, 2016an portuan zehar mugitu diren merkantzien merkatuko balioa 8.407 milioi eurokoa izan dela nabarmendu dute, 2015. urtean baino handiago, zehaztu dutenez, orduan balioa 7.892 milioi eurokoa izan zelako.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.