Txarako kasuan absoluzioa izan zela azaldu dute, baina alkate ohiak zuzenbidearen kontra joaten zela ez zekielako. Dokumentazioarenean ezin izan da frogatu.
Gobernu Taldeko kideak.
Martin Beramendik zituen bi auzien epaien harira —
bietan absolbitu dute—,
Hamaika Batek prentsa oharra helarazi zuen atzo. Horri erantzun dio Oiartzungo Udalak. Hala, udal erakundeak aldarrikatu du Beramendi alkate izan zeneko (2003-2007 legegintzaldian) “irregulartasun larriak argitzeko” bidea egin duela.
Txara parkeko zein
dokumentuen zaintzaren auzietan irregulartasunak izan zirela gogorarazi du udalak, “nahiz eta Beramendi bi kasuetan absolbitu duten”. Horrela, Mendibilgo parkearen kasuan, udalaren esanetan, “frogatua geratu da Beramendik Administrazio Publikoaren Kontratuen Legea ez zuela bete eta prozedura administratiborik gabe, arbitrarioki, modifikatu zuela udalaren kontratu bat”. Absolbitzeko arrazoia izan zen Beramendik ez zekiela zuzenbidearen kontra ari zela.
Dokumentuen kasuan, udalak nabarmendu du alkate ohiak berak aitortu zuela Eusko Alkartasunaren egoitzara eraman zituela dokumentuak, “lan politikoa egin ahal izateko”. Horren harira, udaletxetik dokumentazioa faltatu zela eta horiek bilatzen aritu behar izan zutela udal departamentuek frogatu zuen epaimahaiak. Ildo horretan, Alkartetxera eramandako dokumentazio kaxak berberak ote ziren ezin izan dela frogatu esan du herri epaimahaiak.
“Herritarren interesak aurretik”
Egungo udal gobernu taldeak adierazi duenez, bi epaiak onartzen ditu. “Era berean, egon ziren irregulartasunak gaitzesten ditu, epaitegiak arduraduna identifikatzeko gai izan ez badira ere”, gaineratu dute.
Gogorarazi dute 2007-2011 legegintzaldian —Eusko Abertzale Ekintzaren eskuetan zegoen udal gobernua— Kode Etikoa onartu zutela, “neurriz kanpoko protokolo gastuei aurre egiteko”. Salatu dute Beramendik alkatetza izan zuen lau urteetan gastu mota hori 183.600 eurokoa izan zela. EH Bilduren gobernuak kode etiko hori bere egiten duela ziurtatu dute, eta hilero protokolo gastuen berri ematen zaiela herritarrei.
Bukatzeko, uste dute udala kudeatzen dutenek herritarrekiko “arduraz eta errespetuz” lan egin behar dutela. Horrela, berretsi dute legegintzaldi honetako gobernu eredua “gardena, arduratsua eta herritarren interesak lehenesten dituena” izango dela. “Kudeaketa irregulartasunek gehien kaltetzen dutena Oiartzungo herria bera da”.
