Aldundiak oiartzuarren proposamenak jaso ditu, 2018ko aurrekontuak zehazteko

Oiartzuarrek euren ekarpena egiteko aukera izan dute. Ekainaren 30era arte egin daitezke datorren urteko aurrekontuarentzako proposamenak.

Erik Gartzia Egaña

Oiartzun

2017/05/10

10:00etatik 19:00etara bitartean egon zen karpa, Doneztebe plazan.

Gipuzkoako Foru Aldundia 2018ko aurrekontuak prestatzen ari da. Horretarako, herriz herri ari dira herritarren ekarpenak biltzen. Atzo Oiartzunen izan ziren, Doneztebe plazan jarritako karpan. “Herritarren beharrei pultsua hartu, eta haien iradokizunak pertsonalki entzun eta jaso nahi ditugu”, esan du Imanol Lasa aldundiko bozeramaileak. Horrela, herritarrak entzutea ez ezik, aldundiaren jardueraren berri ere ematen dute. Gainera, aurrekontuen edukia azaldu eta laguntza eskaini zieten, balizko zalantzak argitze aldera. Horrez gain, Joseba Muxika Partaidetza zuzendariak topaketa egin zuen Oiartzungo kirol elkarteetako ordezkariekin. “Elkarte ehuna osatzen dutenengandik gertu egon nahi dugu”, esan du Muxikak. Izan ere, bere hitzetan, errealitatea ongi ezagutzen dute: “Balio handiko lana egiten dute. Lan hori erraztu eta aurrekontuak aberastu nahi ditugu haien eskarmentuarekin”. Ekarpenak egiteko bideak Atzo karpatik pasa ezin izan zuenak, ekainaren 30era arte izango du ekarpen edo proposamenak egiteko epea. Etxez etxe banatutako eskuorria bete eta aldundiak Donostiako Gipuzkoa plazan duen arretarako bulegoan utz daiteke. Internet bidez ere parte har daiteke, aldundiaren webgunean sartuz. Proposamenak bidaltzeko aukeraz gain, beste bi ere ematen dizkiete gipuzkoarrei. Batetik, Gipuzkoaren etorkizuneko erronka nagusia zein den zehaztea. Bestetik, aldundiak zein arlotan inbertitzea nahi dute. Baldintza bakarra hamasei urtetik gora edukitzea dela adierazi dute. Jakinarazi dutenez, proposamen guztiak memoria batean jasoko dituzte. Bertan zehaztuko dute zeintzuk onartu dituzten, zeintzuk ez, eta horien zergatiak azaldu. Datorren urteko urtarrilean parte hartzaile guztiei helaraziko diete. Proposamenak egiteko laguntza edo aholkularitza behar duenak, e-posta bidez edo telefonoz (943 11 39 60) jar daiteke harremanetan. Gipuzkoako 37 udalerrietan jarriko dute karpa, eta Oiartzun izan zen hirugarren geltokia. Gaur Pasaian egongo da.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.