'Ibar ixil batean', Iñaki Zabaletaren bosgarren diskoa

Hamabi kanta jaso ditu oiartzuarrak, tartean hazi zen herriari eskainitakoak

in?aki zabaleta 2

Oiartzungo Mecca estudioetan grabatu du bosgarren diskoa.

Iñaki Zabaleta abeslari eta musikagile oiartzuarrak (Bergara, 1949) bakarkako bosgarren diskoa kaleratu berri du. Ibar ixil batean izena jarri dio bere lan berrienari. Azaldu duenez, egindako ibilbidearen laburpen antzekoa da diskoa. Euskal bertso eta olerkiei musika jarri die Zabaletak. Hamabi kantek osatzen dute diskoa, eta hazi eta hezi zen herriari —egun Donostian bizi da— dion atxikimendua adierazten die Oiartzungo mendietan II eta Basarriren Oiartzun zarrari kantuz kantuetan. Xabier Leteren Neguan izan zen poema ere musikatu du Zabaletak. Errefuxiatuen drama ere gogoan izan du abesti batean. Gainera, aurrez argitaratutako hiru abestiren bertsio berriak jaso ditu disko berrian (Jean Baptiste Elizanbururen Apexa eta lorea, eta Aingeru bati; baita Erronkari kantuarena ere). Diskoa autoekoitzia da, eta Oiartzungo Mecca estudioetan grabatu du. Juantxo Zeberio Etxetxipiak moldatu ditu abestiak. Azala, berriz, Manu Muniategiandikoetxeak diseinatu du. Diskoa Oiartzunen bertan aurkeztuko du, uztailaren 8an egingo duten folk jaialdian. 18:30ean hasiko da kontzertua, Doneztebe plazan. Ibilbide luzea Bergaran jaio bazen ere, Oiartzunen hazi zen Zabaleta. Don Bosco ikastetxeko koruan hasi zen kantatzen. Herriz herri abesten hasi zen ondoren, eta Madrilen soldadutza egiten ari zela iritsi zen bere bakarkako lehenengo diskoa (Euskal Herriko kantu zaharrak, 1974). Etxera bueltatzean Oskarbi taldean aritu zen, eta hainbat diskotan parte ahrtu zuen. Bakarkako lanak, berriz, honakoak ditu, 1974an argitaratu zuenaz gain: Nafarroatik zehar (IZ, 1982); Hemeretzi (Elkar, 1988); eta Amodioa zer dan (IZ, 2002).
Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.