Aurkia eta ifrentzua Oiartzungo futbol taldeentzat
Bigarren Mailako taldeak Zarautzen galdu dute; Ohorezko Erregionalekoek Hondarribian irabazi dute
Asteburu gazi-gozoa izan da Oiartzun Kirol Elkarteko futbol talde nagusientzat. Bigarren Mailako taldeak Zarautzen jokatu zuen. Talde igo berria dira zarauztarrak, baina ez zen diferentzia handirik nabaritu. Norgehiagoka nahiko berdinduta joan zen, eta bi taldeek estrategiako jokaldiak aprobetxatu zituzten, gehienbat, aukerak sortzeko.
Etxekoak aurreratu ziren, ongi burututako jokaldi bati esker. Ane Perezek buruz egindako erremate bati esker, oiartzuarrek berdintzea lortu zuten, atsedenaldira joan aurretik. Bigarren zatian ere, Zarautzek zein Oiartzunek aukera ugari izan zituzten. 78. minutuan, baina, hautsi zen berdintasuna, falta jaurtiketa bati esker. Gurutze Fernandezen jokalariak ez ziren burumakur geratu, eta berdinketa bilatu zuten. Zarauztarrek, baina, talde urdinaren akats bat baliatu zuten markagailuan 3-1ekoa jartzeko.
Bigarren jardunaldian puntu bakarra lortu dute. Datorren asteburuan ez dago jardunaldirik, eta hilaren 24ko asteburuan jasoko dute, Karla Lekuonan, Pauldarrak taldea.
Denboraldia ongi hasi dutenak Ohorezko Erregional Mailakoak dira. Atzo goizean jokatu zuten, Hondarribian, eta 0-2 gailendu zitzaien etxeko taldeari. Datorren asteburuan Real Union Bren kontra ariko dira, Ugaldetxon. 
