'ArNasa TxiKitxuak' dokumentala emango dute hilaren 17an; lider indigenen presentzia egongo da
Josune Cousillas kultura zinegotzia, Mikel Mendizabal Garabidekoa eta Ioritz Aizpuru euskara zinegotzia.
Amerikako bi hizkuntza indigenen errealitatea hurbilduko dute hilaren 17an. Oiartzungo Udalak eta Garabide elkarteak dokumental emanaldia eta solasaldia antolatu dituzte.
ArNasa TxiKitxuak (Andeetako bi hizkuntzari eutsi guran) da dokumentala, eta izenak iradokitzen duen bezala, nasa eta kitxua hizkuntzen egoera aztertzen dute Garabidek sustatutako dokumentalean.
Emanaldiaren ondoren, lider indigenekin solasaldia egongo da. Euskal Herrian daude, aditu titulua ateratzen. Beren hizkuntzaren egoeraren berri emango dute.
Garabide elkarteak zein Oiartzungo Udalak bertara joateko gonbita luzatu dute. Udal erakundearen izenean, Josune Cousillas Kultura zinegotziak nabarmendu du hizkuntzak kultura batean duen garrantzia. Ioritz Aizpuru Euskara saileko arduradunak, berriz, hizkuntza gutxituen arteko ezagutza beharrezkoa dela azaldu du. Ildo horretan, Garabide elkarteak egiten duen lana goraipatu dute udaleko ordezkariek.
Emanaldia 19:00etan hasiko da, udaletxeko pleno aretoan.