Azkar joan zen atzoko plenoa.
Urriko ohiko plenoa egin zuten atzo.
Gai zerrendako bederatzi puntuez gain, urgentziazko beste bat aztertu zuten, Eneritz Arbelaitz jarduneko alkate zela.
Gairik korapilatuena 2018ko taxi tarifenari zegokiona izan zen. Ez sortu zuen eztabaidagatik —aho batez atera zen aurrera—, baizik eta zenbaki dantzagatik. Sinplifikatze aldera, Gipuzkoako batez bestekora hurbiltzeko ahalegina adostu dute eskualdeko lau udaletako ordezkariek eta taxilari elkarteek. Zenbat eta batez bestekotik urrutiago, gutxiago igoko dira Oarsoaldeko tarifak.
Oarsoaldea SAri hirugarren hiruhileko ordainketa egitea adostu zuten. ASAP programa, turismoa, ekintzailetza eta enplegua bultzatzeko bideratuko dituzte 90.600 euro.
Gai zerrendatik kanpoko gaia, berriz, Izenpe SArekin hitzarmena egitekoa izan zen. Oiartzuarrek administrazioarekin Internet bidezko tramiteak egiteko, sinadura elektronikoa izan beharko dute. Akordio horrekin, herritarrek eta eragileek identifikazio hori lor dezakete.