Enpresa txiki eta ertainak euskalduntzeko plana hiru urte egongo da indarrean; 50 enpresa euskalduntzea da helburua
Mikel Urdangarin Ahize-AEK-ko teknikariak eman zituen azalpenak.
Lanin egitasmoa martxan da.
Iazko urrian egin daitekeenaren aurkezpena egin zuten, sei hilabeteko diagnosiaren ondoren. Hori finduta, enpresa txiki eta ertainen euskalduntzea sustatzen hasiko dira.
Atzo arratsean langunea egin zuten Manuel Lekuona bibliotekako bilera gelan. Enpresa batzuetako ordezkariez gain, udalekoak eta Ahize-AEK-ko teknikari Aitzol Perez de San Roman eta Mikel Urdangarin izan ziren langunean. Hizkuntza aholkularitza enpresa horrek irabazi du Lanin aurrera eramatea ahalbidetzen zuen lehiaketa publikoa.
Lanin proiektuaren plangintza azaldu zuen Urdangarinek: Lanin-en eskaintza, eskatuko duena eta plana aurrera eramateko egutegia xehatu zituen. 2019ra arte iraungo du, atzoko bileratik bertatik hasita. Oiartzunen 500 enpresa txiki eta ertain daude, 3.000 langilerekin. Datozen bi urteetan 120 enpresetara iristea da helburua, 60na urteko. “Erronka handiegia dela esaten digute. Nik uste dut lorgarria dela”, esan zuen Urdangarinek.
Sei kanpaina
Plangintzaren arabera, sei kanpaina egingo dituzte. Lehenengoan, orain arte parte hartu duten enpresengana —”laguntzaileak” izena jarri diete— eta Oiartzungo Udalarekin harremanetan daudenengana —”hornitzaileak”— joango dira. Gainontzeko bost kanpainak industriaguneka eta sektoreka egingo dituzte. Lanin-en, edozein momentutan, parte hartzea eskatuko duten enpresei ere erantzungo diete.
Enpresak bisitatu eta planaren eskaintza aurkeztuko diete. Eskainiko diren zerbitzuak —errotulazioa, itzulpenak, euskara ikastaroak…— jasotzen dituen fitxa bat jasoko dute, eta beharraren edota nahiaren arabera bete beharko dute atxikitzen diren enpresek.
Enpresek, bere aldetik, hainbat konpromiso hartu beharko dituzte, hala nola solaskide bat izendatzea, egitasmoari zortzi ordu eskaintzea, begirunez jokatzea edo zerbitzua euskaraz emateko prest agertzeko ikurra jartzea, besteak beste. Horrez gain, enpresei arreta zerbitzua eskainiko diete, eta 24 ordutan erantzungo dute. Fermiñene eraikinean egongo da bulego fisikoa, asteartetik ostegunera.
E-posta helbidea ere aktibatu dute.
Planaren jarraipenari dagokionez, Ahize-AEK-koak urtean sei aldiz bilduko dira udaleko ordezkariekin. Enpresekin languneak egiteko datak ere jarri dituzte. Datorren otsailaren 8an eta ekainaren 14an izango dira hurrenak.
Urdangarinek argi utzi nahi izan du beren helburua enpresei laguntzea dela, euskarazko zerbitzua eman dezaten.
