Pasaiako portuaren defentsan elkarretaratzea egin du LABek
Atzo elkarretaratu ziren Portu Agintaritzaren Administrazio Kontseilua bileran zen bitartean.
Kezka zabaldu da Pasaiako portuan. Trafikoaren datuak ez dira onak eta gero eta gehiago dira azpiegituraren etorkizuna kolokan jartzen dutenen ahotsak. Horrek ezinegona sortu du, besteak beste, portuko langileengan, eta LABeko delegatuek, kezka horren lekuko, elkarretaratzea egin zuten atzo goizean portuan. Pasaiako portua defenda dezagun aldarria eskuan Administrazio Kontseilua bilera egin bitartean elkarretaratu ziren Portu Agintaritzaren sarreran.
“Gaia korapilatsua” dela iritzi dio LABek, eta “inplikatuta dauden agente guztien arteko eztabaida lasaia” beharrezkoa dela defenditu du sindikatu abertzaleak.
“Txatarraren eta siderurgiaren produktuekiko menpekotasuna”, zuzendaritzaren aldetik “planifikaziorik eza” eta “euskal politikaren eta ekonomiaren buru direnek itsas garraioaren negozio guztia Bilbon elkartzeko egin dute apustua” dira, LABen iritziz, Pasaiako portuaren gainbeheraren arrazoi nagusiak.
LABen iritziz, lurraldeko erakunde eta eragile ekonomikoek premiaz erabaki behar dute Pasaiako portuaren jarduera industriala indartu nahi duten ala ez, eta baietz erabakitzekotan, Euskal Portuen Legea garatu eta portuaren eskuduntza osoa bereganatzea eskatu du.
“Pasaiako portuan arrantza ontziak eta merkantzia ontziak behar dira, jarduera komertziala eta lanpostuak sortzen”, defendatu du LABek, eta zuzendaritzari Pasaiako portuaren etorkizunaren alde lan egiteko eskatu dio.
