Ostiralean jokatuko dute finala, Altzan; Txosteko Oinatz Aizpuruk bere inpresioak partekatu ditu
Oiartzungo pilotariak prest daude finalari aurre egiteko.
Gipuzkoako Herriarteko Txapelketako palako finalak ostiralean jokatuko dituzte. Oarsoaldeko bi herriren —Oiartzun eta Errenteria-Orereta— ordezkariak izango dira Altzako frontoian, 19:00etatik aurrera.
Oinatz Aizpuru Txost pilota elkarteko palistetako bat ariko da kantxan. Orain artekoa “nahiko eroso” joan dela esan du, eta finalerako dituen sentsazioei buruz ere aritu da. “Finalera dena ematera joango gara”, ziurtatu du Aizpuruk. Jakitun da parez pare izango dituztenak ez direla gozoki bat izango. “Badakigu Oreretak talde nahiko txukuna prestatu dutela, eta partidetan aldaketak egin dituztela. Gure kasuan, beti bi bikoteek jokatu dugu, eta mantenduko ditugu”, iragarri du.
Errenteriarrengandik, koadro artean behintzat, ez du ezer onik espero: “Talde gogorra dira, ongi astintzen dute pilota. Nahiko lehiatua izango dela uste dut, eta ikusi beharko da frontoiaren ezaugarriek nori egiten dioten mesede”.
Orain arte errazago aritu direla jakinarazi du, arerioen pilotariren bat beti hankamotzago aritu zitekeelako. Errenteria-Oreretakoek, kontrara, bikote orekatua dutela esan du, eta potentzialitatea badutela.
Pala motzarekin adi
Finala finala denez, ez du itzuliko partidarik. Larruzko paletaren eta pala motzaren artean, bigarren modalitateari eman dio garrantzia. “Pala motzean tanto gehiago daudenez [40; bestean, 35], hor erabaki daiteke. Larruzko paletan galduko bagenu, garrantzitsua da ahalik eta alde txikienarengatik galtzea, gero pala motzean buelta emateko”, zehaztu du.
Altza ez dago Oiartzundik oso aparte, eta ahal bezain beste oiartzuar hurbilarazten saiatuko direla azaldu du: “Espero dugu Oiartzungo jendea etortzea eta Oiartzunek irabaztea, noski”. Aizpuruk, badaki, hala ere, palak ez duela hainbesteko zaletasunik: “Eskuzkoarekin konparatuta”, penatu da, “jende gutxiago hurbiltzen da erreminta erabiltzen duten modalitateetara”. Altzako frontoia auzoaren erdigunean egoteak bertakoak hurbilarazten dituela esan du, eta horrek giroa sor dezakeela.
Irabazten duenak irabazten duela ere, elkarrekin afalduko dute errenteriarrek eta oiartzuarrek. “Etxean jokatzen duenak kanpokoari bazkaldu edo afaltzera gonbidatu egiten dio. Oraingoan, elkarrekin joango gara afaltzera, sagardotegira”. Batzuk ospatzera, beste batzuk penak itotzera, baina kirol legez beti. Onenak irabaz dezala.
Partidak
- Larruzko paleta: Antxin Ezkerro-Orkatz Argote (Oiartzun) / Ibon Eskisabel-Abel Pichel (Errenteria-Orereta).
- Pala motza: Oinatz Aizpuru-Jon Irigoen (Oiartzun) / Yorel Martinez-Ruben Pichel (Errenteria-Orereta).