Hainbat su piztuko dituzte bihar arratsean; Oiartzungo Udaltzaingoak hainbat gomendio eman ditu seguruak izan daitezen
San Joan Sua auzo eta baserri bat baino gehiagotan piztuko dute, Iturriotzen kasu.
Bihar arratsean urteroko tradizioa berrituko dute Oiartzunen. Herriko auzo eta baserri guztietan piztuko dituzte suak, eta haiek seguruak izan daitezen, hainbat aholku eman ditu Oiartzungo Udalak. Honakoak dira:
- Sua piztuko den pila hiru metro baino altuagoa ez izatea.
- Erregai solidoak (kartoia, egurra…) bakarrik erretzea.
- Sua eraikin, ibilgailu edota linea elektrikoetatik urrun piztea.
- Suak 20:00etatik aurrera piztea.
- Suak piztuko diren inguruko etxeetako leiho eta ateak ixtea.
- Haurrak begi bistatik ez galtzea.
- Haize handia baldin badago, surik ez piztea.
- Bukatzean, sua guztiz itzali dela ziurtatzea.
- Larrialdirik badago, SOS Deiak-era (112) edo Udaltzaingora deitzea (943 49 33 11).
Oiartzungo auzo eta baserrietan su ugari piztuko dituzte bihar gauean. Esaterako, Elizalde auzoko bizilagunek plazako sua berreskuratu nahi dute, eta egitaraua antolatu dute. 19:30ean Haurtzaro Dantza Taldeko dantzariek hasiko dute arratsa, eta ondoren, suaz gain, afaritarako eta musikarentzako garaia izango da.
Tradizioa errotuago dagoen beste auzoetan ere piztuko dituzte suak. Adibidez, Arraguan goialdean eta behealdean piztuko dituzte, eta Iturriotzen ere suaren inguruan elkartuko dira. Ugaldetxon ere jarri dute zita, Kalexa plazan. Altzibarren, berriz, festen egitarauaren barruan sartu dituzte; 19:30ean hasiko dira pila egiten eta 21:00etan piztuko dute.
Horiek dira auzoetako su
ofizialak. Hamarnaka gehiagok argituko dute gaurik motzena. Hori bai, segurtasuna bermatzeko gomendioak ederki beteta.
