Hilaren 15ean ospatuko dute, zazpigarren aldiz, meategiaren inguruan egiten den festatxoa; denentzako ekitaldiak egingo dituzte
Arditurriak doan bisitatzeko aukera egongo da hilaren 15ean.
Arditurri Eguna zazpigarren aldiz egingo dute hialren 15ean. Arditurriko meategi zaharren bueltan, era askotako ekitaldi ugari antolatu dituzte hurrengo igande goizerako.
10:00etatik 14:00etara, berriz, meatzearen ustiaketako azken urteak islatzen dituen argazki erakusketa berria ikusteko aukera egongo da.
10:30etik 13:00etara haurrentzako tailer eta jolasak egingo dituzte, Abaraxkaren eskutik. Ez da haurrentzako prestatutako jarduera bakarra izango: haur-proba egingo dituzte 10:30etik 12:30era. Umeak adinka sailkatuko dituzte, eta horren arabera, pisua handiagoa ala txikiagoa duten zakuak bultzatu beharko dute. Parte hartzen dutenek txanoak eta kamisetak jasoko dituzte, eta irabazten dutenek familiarekin asteburu bateko egonaldi bat jasoko dute saritzat, Arritxulon.
Haurrak ez dira tiraka ariko diren bakarrak izango. 13:00etan, Emarrikoek erakustaldia egingo dute. Zakuak beharrean, harria mugituko dute, ohi bezala.
Bisita eta hegaztiak
Arditurri Eguna izanda, meategiak bisitatzeko aukerarik ez da faltako. Oraingoan, doan ikus daitezke, oinarrizko bisita eginez edo sakonekoa. Ezin da aurre-erreserbarik egin; beraz, sarrerako atean itxaron beharko dute interesa dutenek. 10:00etatik 14:00etara egin daiteke bisita.
Bestalde, 12:00etan, Igeldoko Arrano Etxean sendatu dituzten hegaztiak askatuko dituzte. Animalia hegaldunak euren inguru naturalera bueltatu nahi dituzte, eta horretarako bost minutuko ibilalditxo bat egingo dute. Leku seguruan daudenean askatuko dituzte. Hala ere, oraindik ez da ziurra egingo dutenik. Izan ere, hegaztien osasun egoerak baldintzatuko du.
Arditurri Eguna 2012an hasi ziren ospatzen. Gipuzkoako Parketxe Sareak eta Oiartzungo Udalak antolatzen dute.