Udal Ur Zerbitzua Añarberen esku utzi nahi dutela salatu du EH Bilduk
Erabaki ahalmena Lezon egongo ez litzaketela ohartarazi dute; "udalaren baliabide eta zerbitzuak negozioa bihurtzea da helburua", esan dute
Lezoko EH Bilduk adierazi duenez, udal gobernuak Udal Ur Zerbitzua Añarbeko Urak mankomunitatearen eskuetan utzi nahi du. “Lezoar guziona den ondarea, eskumena eta erabaki ahalmena beste batzuen eskuetan utzi nahi du”, salatu du koalizioak.
Ura eta zerbitzua kalitatezkoa dela aldarrikatu dute, eta isurtzean, ingurumenari ahalik eta kalte txikiena egiteko prestatuta dagoela. Horretarako inbertsio handiak egin direla gogorarazi du EH Bilduk, udalaren bitartez eta Añarberen bitartez. “Añarbeko Urak mankomunitatearen kide da Lezoko Udala, eta inguruko beste Udalekin batera modu mankomunatuan eta elkarlanean egin dira orain arte ere inbertsio handi zenbait. Zenbait zerbitzu ere mankomunitatearen bidez ematen dira dagoeneko ere”, gaineratu dute.
“Interes politikoak”
Añarbeko Uraken eskuetan utziko balute, erabaki ahalmena Lezotik kanpo egongo litzatekeela salatu dute: “Eta erabakiak Añarbeko gehiengo eta interes politikoen arabera hartuko direla esan nahi du horrek. Lezok berea duen eskumeneko erabakiak beste interes batzuen arabera hartuko dira beraz”.
Hainbat galdera plazaratu dituzte, eta udalaren gobernuaren erantzunik jaso ez dutela jakinarazi dute: “Nola ziurtatuko da Lezoko zerbitzuari behar bezalako segimendua egingo zaiola? Nola kudeatuko dira urgentziazko matxurak eta bestelakoak? Nola ziurtatuko da inbertsioak ez direla interes politikoen araberakoak izango? Zein onura ekarri nahi ditu aldaketa honek? Zein azterketa egin dira zerbitzuaren kudeaketa osoa Añarberen eskuetan uztea proposatzeko?”.
EH Bilduk esan duenez, erabaki horren ondorioak ez dituzte ezagutzen, eta udaleko langileekin ez dutela gaia landu, ezta lezoarrekin ere. Erabakiaren atzean interes politikoa dagoela uste dute, eta udalaren baliabide eta zerbitzuak batzuen negozio bihurtu nahi dela.
Bide hori alde batera uzteko eskatu diote udal gobernuari. “Alderdiaren eta kanpoko interesak alde batetara utzi eta lezoarren zerbitzura aritzeko eskatu behar diogu. Hondakinen bilketarekin eman zuten lehen saltoa, zerbitzua mankomunitatearen esku utzi, aldatu eta lezoarrenak ez diren interesen arabera moldatuaz. Eta argi geratzen ari da, aldaketa hauek ez direla izan ez eraginkorrak, ez merkeagoak eta are gutxiago zerbitzuaren mesedetan”.
Ur zerbitzuak bide bera har lezakeela iritzi dute, eta epe luzera ondorio kaltegarriak izan ditzakeela. Zerbitzuaren beharren azterketa bat egitea eskatu dute, eta erabaki ahalmena udalerrian gelditzea nahi dutela azaldu dute. “EH Bildun guztion ondarea ere baden zerbitzu hau gure eskuetan mantentzearen aldeko apustua egiten jarraituko dugu”. 
