Kultur ekitaldiak iragarriko du festa badatorrela

Osasun Pastoralekoak omenduko dituzte, Mugarri aurkeztu eta erraketistei buruzko erakusketa zabalduko dute

2018/08/01

Osasun Pastoralaren lana aitortuko dute gaur arratsaldean.

Urtero bezala, abuztuaren 1eko kultur ekitaldia xanistebanen aperitiboa izango da. Gaur arratsaldean egingo dute, 18:00etan hasita, udaletxeko pleno aretoan. Oiartzun urtekaria aurkeztuko dute lehenik eta behin, eta ondoren, Mugarri bildumaren aurtengo zenbakiaren txanda izango da. Joxe Mari Mitxelenak, Antton Kazabonek, Anton Mendizabalek eta Joxan Unsainek landu dute pilota jorratzen duen argitalpena. Gainera, kartel lehiaketa irabazi zutenei sariak emango dizkiete. Omenaldietarako txanda ez da faltako. Osasun Pastoralaren lanari aitortza egingo diote. Gainera, festetako erakusketa inauguratuko dute. Bi oiartzuarrek —Ainhoa Palomok eta Jon Juanesek— osatu dute erakusketa, erraketistei buruzkoa. Hilaren 3tik 6ra egongo da ikusgai, 11:00etatik 14:00etara eta 17:00etatik 21:00etara. Raketistak Lehen eta Orain elkarteko kideek bisita gidatua eskainiko dute abuztuaren 3an (ostirala), 12:15ean. Hondakinak Xanistebanetan festa nagusi izan arren, betebehar guztiak ez dira alde batera utzi behar. Hondakinen kasuan, Elizaldeko hainbat txokotan aldaketak egingo dira, hilaren 2tik 7ra. Egun horietan, hondakinak goizean bilduko dituzte, eta egun bakoitzari dagokion hondakin frakzioa 08:00etatik 09:00etara atera beharko da. Kale eta plaza hauetan aldatuko da: Donibane, Mendiburu, Putxutxoerreka, Aialde, Kontzejupe, Kontzejuerreka kaleak; Rafael Pikabea kaleko 1, 3, 5, 7 eta 10 zenbakiak eta, Doneztebe, Landetxe, Euskal Herria eta Kaskazuri plazak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.