Mugarri eta Oiartzun urtekaria aurkeztu dituzte, kartel txapelketako sariak banatu eta erraketistei buruzko erakusketa ireki dute
Osasun Pastoralako kideek oroigarria jaso dute.
Abuztuak gaur hasi du bere bidea, eta horrek gauza bat esan nahi du: Oiartzunen kultur ekitaldia egiteko eguna dela. Urteroko legeari hutsik egin gabe, udaletxeko pleno aretoa jendez lepo bete da, ekitaldia jarraitzeko.
Ioritz Aizpuru eta Josune Cousillas zinegotziak egin dituzte saioaren gidari lanak, eta Jexux Leonet alkateari pasa diote hitza lehenik eta behin. Leonetek Oiartzun herri aktiboa eta kulturalki aberatsa dela nabarmendu du. Kulturaren munduan urte honetan egindakoari errepaso txiki bat eman dio. Aintzane Galardi eta Antton Kazabon idazleak zoriondu ditu, baita Alaia Martin, Jon Martin eta Arkaitz Oiartzabal bertsolariak ere
Hizkuntzari dagokionez,
Paeta zaharrak erantzun mahai jokoa eta
Redadeg-i egindako ekarpena ez ditu ahaztu. Aurtengo xanistebanetako omenduentzako hitzak izan ditu baita ere: Arraguako Aldeguna elkartea —50 urte bete ditu—, herriko mugimendu feminista eta Osasun Pastorala. Azken horiei dagokienez, isil-isilik egiten duten lana goraipatu du, beste batzuen bizitza eramangarriagoa izan dadin.
Xanistebanetako Jai Batzodeak hilabeteetan egindako lana txalotu du, eta festetan egon ezin daitezkeenak gogoratu ditu. Bukatzeko, ohiko formula erabili du: “Ongi pasa ala ongi pasa”.
Urtekaria eta Mugarri
Jarraian, Oiartzun urtekaria aurkeztu dute. Aurtengoa 48. zenbakia da, eta argitalpena balioetsi du Cousillasek: “Erraz esaten da 48 dituela. Ezagutu ez ditugun garaien lekuko ona da, eta erakusten du Oiartzunen zein potentzial daukagun”.
Aurtengo Mugarri 25.a da, eta Antton Kazabon, Anton Mendizabal eta Joxe Mari Mitxelena oiartzuarrek eta Joxe Mari Unsain altzotarrak ondu dute.
Pilotasorotik Madalensorora izena jarri diote, eta pilota du ardatz. Unsainek azaldu duenez, kirol horren diagnosia egin dute, historia arakatuz eta egungo egoera zein den azaleraziz. Gainera, etorkizunerako bidea marraztu dutela gaineratu du. Eta baikor dira: “Sendotasuna badu pilotak. Egungo erakundeei tokatzen zaie etorkizuna bermatzea”.
Horrez gain, udazkenean aurkezpen zabalago bat iragarri du Antton Kazabonek, eta dagokion pilota festibala izango duela.
Pilotarekin jarraituz, erraketistei buruzko erakusketa inauguratu dute. Erraketistak Lehena eta Oraina elkarteko Jon Juanesek bideo bat aurkeztu du, erraketisten jokaldi batzuekin. 1917an profesionalizatu ziren erraketistak. Aitzindari izan ziren, eta 1980 urtera arte antolatu zituzten partidak. Egun, ordea, ia ezezagunak dira. Juanesek galdera bat egin du: “Nola da posible horrelako kultura bat izanda, ez dagoen berreskuratzeko aukerarik?”.
Bizipoza, aitortua
Xanistebanetako
kartel lehiaketan irabazle izan direnek beren sariak jaso dituzte, eta ondoren Osasun Pastorala taldekoak omendu dituzte.
Orain dela 21 urte sortu zuten taldea, eta Petra Lekuonako egoiliarrak bisitatzen dituzte, bizipoza eramateko. Hainbat ekitaldi antolatzen dituzte urtean zehar: bingoa, bi astean behin; danborrada; sanferminak; zaharren astea irailean; etxeetara bisitak… Cousillasek euren baloreak nabarmendu ditu, Oiartzungo komunitatearenak direla esanez, eta eskerrak eman dizkiete.
Taldearen izenean, Koro Labandibarrek hartu du hitza, alkatearen eskutik oroigarria jaso ondoren. Aitortza jasoko zutela esan zietenean harritu zirela esan du Labandibarrek, baina sentsazio horretatik pozera pasatu zirela. “Gure herriko udalak omenaldia eskaintzea oso pozgarria da. Hemen gaude senide, lagun eta abarrez inguratuta. Esker hitzak besterik ez ditugu”, adierazi du Labandibarrek.
Taldetik pasatakoak gogoratu ditu, baita hil direnak ere. “Inoiz jasotzea espero ez genuen omenaldia da gaurkoa. Egun hau gurekin gordeko dugu betirako”, bukatu du Osasun Pastoralako kideak.
Ekitaldia ixteko, Olarri dantza taldeko Aiora Etxebestek eta Ekain Susperregik Ohorezko kontrapasa dantzatu diete. Ondoren, protagonista izan diren guztiek familia argazkia atera dute.
Eta bihar, xanistebanak.
