"Indarkeriaren aurkako neurrien hutsuneak" salatu ditu mugimendu feministak

Hilketa matxistak salatzeko elkarretaratzeak egin dituzte Antxon eta Trintxerpen

olatz mitxelena

2018/09/28

Trintxerpen hilotzen siluetak margotu zituzten espaloian, azken biktimak gogoan.

Maguette Mbeugouren hilketa salatzeko elkarretaratzea egin zuten atzo arratsean Antxon, mugimendu feministak deituta, eta gauza bera Trintxerpen, indarkeria matxistak azken astean hildakoak gogoan. Matxismoak berriz hil gaitu eta El machismo mata, hildako gehiagorik ez lemapean irten ziren herritarrak kalera, “amorruz, tristuraz, nekez…esatera nahikoa dela, sistema honek hiltzen gaituela”. Euskal Herrian indarkeria matxistak hiltzen duen seigarren emakumea da Bilbokoa. Antxoko elkarretaratzean, Bilboko hilketak indarkeria matxistaren kontrako neurrien hutsuneak agerian utzi dituela salatu zuten mugimendu feministaren ordezkariek. Bikotekidearen kontrako salaketa jarria zuen biktimak Bilboko udaltzaingoan, baina horrek ez zuen ekarri babes neurririk. “Maguettek aurre egin behar izan zion, bai sistema patriarkalaren indarkeria matxistari, bai sistema kolonial eta arrazista honen indarkeri instituzionalari”. Mezu berean emakumeen aurkako biolentziak mugarik ez duela nabarmendu zuten, indarkeria matxista bestelako biolentzi ardatz batzuekin elkarlotzen dela salatuz, arrazismoa edota klasea kasu. “Ez dira modu isolatuan eta bakartuan ematen diren erasoak; gure sistemaren muinean erreproduzitzen den indarkeria da: kultura aparatuan, komunikabideetan, estatuan, lan merkatuan, familian edota hezkuntza sisteman”, gaineratu zuten, eta gai honi irtenbidea bilatzeko ardura pertsonal eta kolektiboa eskatu zieten”agente sozial, politiko, eta instituzionalei”. “Apustu ausartak eta neurri sakonak eskatu zituzten”. Azkenik, Euskal Herriko Emakumeen Mundu Martxaren izenean autodefentsa feministarako deia zabaldu zuten, “gure bizitzak direlako jokoan daudenak”. “Feministok erantzuteko prest gaude” iragarri zuten, “martxan jarraituko dugu, elkarrekin, borrokan, denak aske izan arte”. Errenteria-Oreretan ere egin zen elkarretaratzean, eta eskualdeko lau udalek bere egin dituzte deialdiak eta mugimendu feministaren salaketak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.